ŊWED MME PSALM 41 - Edisana ñwed Abasi Ibom

Ndibeŋe Abasi Edikɔk

Eke etubom mbon ikwɔ. Psalm David.

¹ ƆFƆFƆN ɔnɔ owo eke otimde ndinam ye eyen ubuene: Jehovah eyenam enye ɔbɔhɔ ke usen nnanenyin.

² Jehovah eyekpeme enye, onyuŋ onim enye uwem; enye eyekut unen ke isɔŋ: ndien afo kuyak enye unɔ se mme asua esie emade.

³ Jehovah eyemum enye akama ke bed mmem-idem: afo ɔkpuhɔre ofuri mbri esie ke udɔŋɔ esie.

⁴ Ŋkɔdɔhɔ nte, O Jehovah, tua mi mbɔm: nam udɔŋɔ okure ukpɔŋ mi; koro mmedue fi.

⁵ Mme asua mi edɔhɔ idiɔk ebaŋa mi, ete, “Ini ewe ke enye edikpa enyiŋ esie edinyuŋ atak?”

⁶ Ndien enye ama edi ndise mi, enye eyesu nsu: enye obon ibak ke esit esie; eyewɔrɔ eketiŋ ke aŋwa.

⁷ Kpukpru mme asua mi edɔŋ kiet eken odu ebaŋa mi: mmɔ eduak idiɔk ebaŋa mi.

⁸ Ete, “Eŋwaŋa enye oburobut ikɔ ke idem: ndien enye emi ɔsuhɔrede ana do ididahake aba ke enyɔŋ.”

⁹ Kpa owo emi edide ufan mi, emi mbuɔtde idem mi ye enye, emi adiade udia mi, ememen ukot etiga mi.

¹⁰ Edi afo, O Jehovah, tua mi mbɔm, nyuŋ menere mi nim ke enyɔŋ, ndien nyesio usiene ye mmɔ.

¹¹ Nda emi mfiɔk nte nnemde fi esit, koro mme asua mi mididarake ibaŋa mi.

¹² Edi ama edi ami, afo omum mi akama ke mfɔnmma mi, onyuŋ ada mi onim ke iso fo ke nsinsi.

¹³ Ekɔm Jehovah Abasi Israel, ke nsinsi nsinsi. Amen, ye Amen.