ŊWED MME PSALM 40 - Edisana ñwed Abasi Ibom

Ekɔm Abasi ke Edinyaŋa Esie

Eke etubom mbon ikwɔ. Psalm David.

¹ ŊKETIE mbet Jehovah; ndien enye ɔnuhɔ ese mi, onyuŋ okop eseme mi.

² Onyuŋ emenere mi osio ke obube nsobo, osio ke okpuk, onyuŋ odori ukot mi ke akwa itiat; enye owuk ikpat isaŋ mi.

³ Onyuŋ esin mi obufa ikwɔ ke inua, kpa itoro Abasi nnyin: ediwak owo eyekut, enyuŋ efehe ndik, enyuŋ ebuɔt idem ye Jehovah.

⁴ Ɔfɔfɔn ɔnɔ owo eke onimde Jehovah ke iberesit esie, ndien misehe mbon-iseri, ye mmɔ eke ewahade etiene nsu.

⁵ Afo, O Jehovah Abasi mi, amanam utibe ido fo, ye ekikere fo eke ekerede nnyin, ewak: idige nte etiŋde mmɔ enɔ fi: mmoyom ndisiak nnyuŋ mbuk mmɔ, edi mmɔ ekan nte ebatde.

⁶ Afo umaŋa uwa emem ye inuak-udia: afo otibi mi utɔŋ: ubupke edifɔp uwa ye uwa idiɔk ido.

⁷ Ndien ndɔhɔ nte, Sese, mmedi: ewet ebaŋa mi ke ikpa-ŋwed.

⁸ Mmama ndinam se afo amade, O Abasi mi, mbet fo enyuŋ edu mi ke esit.

⁹ Mmɔkwɔrɔ eti ido ke akwa esop: sese, ŋkubike mkpɔk-inua mi, O Jehovah, afo ɔmɔfiɔk.

¹⁰ Ndipke eti ido fo ke ɔwɔŋ esit mi; mmetiŋ akpanikɔ fo ye ima fo: ndipke akwa esop ima fo ye akpanikɔ fo.

¹¹ Afo, O Jehovah, udusinke mi esit mbɔm fo; ima fo ye akpan-ikɔ fo eyekpeme mi kpukpru ini.

¹² Koro mme idiɔk-ŋkpɔ eke minyeneke ibat ekande mi ekuk: mme idiɔk ido mi esesim mi, ndien ŋkemeke ndikut ŋkpɔ; mmɔ ewak ekan idet ibuot mi: ndien esit ɔmɔduɔ mi.

¹³ O Jehovah, Yak enem fi ndinyaŋa mi: O Jehovah wara di bɔ mi ubɔk.

¹⁴ But ye esuene eyenam mmɔ eke eyomde ukpɔŋ mi man esobo enye; mmɔ eke esit adatde mmɔ ke se idiɔkde ye ami, eyefiak edem, enyuŋ ekut but.

¹⁵ Mmɔ eke edɔhɔde mi, ete, Aha, aha, eyesomo ke usiene oburobut ido mmɔ.

¹⁶ Kpukpru mmɔ eke eyomde fi eyebre enyuŋ edara fi: mmɔ eke emade erinyaŋa fo eyesuk edɔhɔ kpukpru ini, ete, Ekpono Jehovah.

¹⁷ Ndien ami ndi eyen ubuene ye unana; ndien Ɔbɔŋ osuk ekere mi: afo edi andiŋwam mi ye andinyaŋa mi; O Abasi mi, kunam ubigi.