ŊWED MME PSALM 39 - Edisana ñwed Abasi Ibom

Akam Ndibeŋe Abasi Ifiɔk ye Edidahado

Eke etubom mbon ikwɔ, (kpa) eke Jeduthun. Psalm David.

¹ ŊKƆDƆHƆ nte, Nyekpeme usuŋ mi, man ŋkudue ke edeme mi: nyeda mkpaha ŋkpeme inua mi, ke ini anam-idiɔk osuk odude mi ke iso.

² Ntie imum nnyuŋ ndop, ŋkubi inua mi ŋkpɔŋ se ifɔnde; ubiak mi onyuŋ edemere.

³ Esit mi ofiop mi ke idem, ke ntiede ŋkere ikaŋ obubere asak: ndɔhɔ ke edeme mi, nte,

⁴ O Jehovah, nam mi mfiɔk utit mi, ye idomo mme usen mi, nte etiede; nam mfiɔk nte mfumde.

⁵ Sese, afo omonim usen mi nte ekaubɔk; eyo mi idige baba ŋkpɔ kiet ke iso fo: kpukpru owo edi kpasuk ibifik, esɔŋ nte esesɔŋ [Selah.]

⁶ Owo asasaŋa kpasuk nte ukpɔŋ: mmɔ enam afanikɔŋ edian idem mmɔ ke kpasuk ibifik: enye obok ŋkpɔ onim, ndien ifiɔkke owo eke editaŋde.

⁷ Ntie mbet nso, ndien? O Ɔbɔŋ, mmodori fi enyin mi.

⁸ Sio mi ke kpukpru ndudue mi: kunim mi nte ŋkpɔ nsahi unɔ ndisime owo.

⁹ Ntie imum, ntatke inua mi: koro edide afo akanam.

¹⁰ Sio mi ufen fo ke idem fep: mmeyemere ke utɔk ubɔk fo.

¹¹ Afo ada nduari ɔtunɔ owo abaŋa ndudue, onyuŋ abiat ŋkpɔ idaresit esie nte uta-ŋkpɔ: kpukpru owo edi kpasuk ibifik. [Selah.]

¹² O Jehovah, kop mkpeubɔk mi, nyuŋ kpaŋ utɔŋ ke eseme mi; kudop uyo unɔ mmɔŋeyet mi: koro ami ndide esen owo ye afo, ye oduduŋ, kpa nte kpukpru mme ete mi ekedide.

¹³ Fep mi enyin fo, man iso aŋwaŋa mi, ke mmendahake kaŋa, mmenyuŋ nduhe aba.