ŊWED MME PSALM 38 - Edisana ñwed Abasi Ibom

Akam Owo Abasi Emi Odude ke Ukut

Psalm David eke edade enam owo eti.

¹ O JEHOVAH, kuduari mi ke iyaresit fo, kunyuŋ utɔnɔ mi ke ifiopesit fo.

² Koro idaŋ fo emeduk mi ke idem, ubɔk fo, onyuŋ ɔsuhɔre odoro mi.

³ Iyaresit fo iyakke baba ebiet kiet eke ɔfɔnde odu mi ke ikpɔhidem: idiɔk ido mi iyakke baba nsɔŋ odu mi ke ɔkpɔ.

⁴ Koro mme idiɔk ido mi emefuk mi ke ibuot: mmɔ etie nte edidobi mbiomo, ke edobi ekan mi.

⁵ Ndisime ido mi esin inia mi etebe, enyuŋ ebu iso.

⁶ Mmɔtuhɔ; mmɔnuhɔ eti-eti; nsaŋa ntua kpukpru ini.

⁷ Koro ufiop ɔyɔhɔde mi ke isin: baba ebiet eke ɔfɔnde inyuŋ iduhe mi ke ikpɔhidem.

⁸ Mmofum, mmonyuŋ mbuŋɔ eti-eti: mmeseme mbaŋa mmum esit mi.

⁹ Ɔbɔŋ, kpukpru se idɔŋde mi odu fi ke iso; eseme mi inyuŋ idibeke fi.

¹⁰ Esit mi ebre, odudu mi ɔmɔkpɔŋ mi; ama edi uŋwana enyin mi, kpa mmɔ iduhe ye ami.

¹¹ Mmɔ eke emade mi, ye mme ufan mi ŋko, ke eda nsan-nsan ekpɔŋ ufen mi; oruk mi ke eda anyan ebiet.

¹² Mmɔ eke eyomde ukpɔŋ mi, enyuŋ ekɔk afia enɔ mi: mmɔ eke esinde ubɔk enam mi idiɔk, enyuŋ edɔhɔ ibak, ndien mmɔ etiŋ abiaŋa ofuri usen.

¹³ Edi ami ntie nte inan eke mikopke, ye nte imum eke mitatke inua esiemɔ.

¹⁴ Ntre ke ntie nte owo eke mikopke; eke ibɔrɔ minyuŋ iduhe enye ke inua.

¹⁵ Koro ntiede mbet fi, O Jehovah: afo eyeyere, O Ɔbɔŋ Abasi mi.

¹⁶ Koro ndɔhɔde nte, Mbak mmɔ edara ebaŋa mi: mmɔ ema emen idem ekan mi ke ini ukot mi ɔfiɔnɔrede.

¹⁷ Koro ami ntiede nte owo eke oyomde ndiduɔ, ubiak mi onyuŋ ana mi ke iso kpukpru ini.

¹⁸ Koro nyeyarare idiɔk ido mi; nyeduhɔ mbaŋa mme idiɔk ŋkpɔ mi.

¹⁹ Ndien mme asua mi ekpraŋ ke idem, enyuŋ esɔŋ: mmɔ eke etɔkde mi ke ikpikpu enyuŋ ewak.

²⁰ Ndien mmɔ eke edade idiɔk esio usiene eti, esua mi, koro mbinede ŋkpɔ eke ɔfɔnde.

²¹ O Jehovah, kukpɔŋ mi: O Abasi mi, kuda anyan usuŋ ye ami.

²² Wawara di bɔ mi ubɔk, O Ɔbɔŋ emi anyaŋade mi.