ŊWED MME PSALM 36 - Edisana ñwed Abasi Ibom

Ibak Esit Owo ye Nsɔŋ Urua Ima Abasi

Eke etubom mbon ikwɔ. Eke David owo Jehovah.

¹ IDIƆK ɔdɔhɔ idiɔk owo ke ɔwɔŋ esit esie: baba uteŋe Abasi iduhe enye ke iso.

² Koro enye abiaŋade idem esie ke enyin esiemɔ, abaŋa erikut ye erisua idiɔk ido esie.

³ Ikɔ inua esie edi abiaŋa ye nsu: enye emetre ndidi ɔniɔŋ nnyuŋ nnam eti.

⁴ Enye ana ke bed esie ekere abiaŋa; onim idem esie ke usuŋ eke midige eti; isuaha idiɔk.

⁵ O Jehovah, ima fo odu ke enyɔŋ; akpanikɔ fo osim ke ikpa-enyɔŋ.

⁶ Eti ido fo etie nte obot Abasi; mme ikpe fo edi akwa udem. Jehovah afo eyenim owo ye unam.

⁷ O Abasi, ima fo ɔsɔŋ urua adaŋa didie! nditɔ owo enyuŋ ebuɔt idem mmɔ ke mfut mba fo.

⁸ Mmɔ eyeyere ke isek ufɔk fo: afo eyenyuŋ ɔnɔ mmɔ akpa inem ŋkpɔ fo eŋwɔŋ.

⁹ Koro obube mmɔŋ uwem odude ye afo: nnyin iyekut uŋwana ke uŋwana fo.

¹⁰ Dɔdiɔŋ ma mmɔ eke efiɔkde fi; nyuŋ nam se inende ye mbon esit kiet.

¹¹ Kuyak ukot iseri osim mi: kunyuŋ uyak ubɔk mme idiɔk owo ebin mi efep.

¹² Do ke mme abak-ibak eduɔŋɔ: etɔ mmɔ eduɔk ke isɔŋ, ndien mmɔ idikemeke ndidaha ke enyɔŋ.