ŊWED MME PSALM 34 - Edisana ñwed Abasi Ibom

Nɔ Abasi Ekɔm ke Edinyaŋa Emi Enye Anyaŋade Owo Osio ke Idiɔk

Eke David, ke adaŋoro enye anamde ŋkpɔ nte ibuot esie abiarade ke iso Abimelech, emi ebinde enye efep, ndien enye ɔnyɔŋ.

¹ NYEKƆM Jehovah kpukpru ini: itoro esie eyesuk atak mi ke inua.

² Ukpɔŋ mi eyeda Jehovah obure mbure: mbon nsukidem eyekop, enyuŋ edara.

³ Mbufo etiene mi ekpono Jehovah, eyak nnyin inyuŋ itoro enyiŋ esie ɔtɔ kiet.

⁴ Ŋkoyom Jehovah, ndien enye eyere mi, onyuŋ osio mi ke kpukpru se ndigede.

⁵ Mmɔ ekewuk enyin ese enye, ndien iso aŋwaŋade mmɔ: ndien mmɔ ikwe but ke iso.

⁶ Eyen ukut emi ekeseme, ndien Jehovah okop, onyuŋ anyaŋa enye osio ke kpukpru nnanenyin esie.

⁷ Angel Jehovah ana akan mmɔ eke ebakde enye okuk, onyuŋ anyaŋa mmɔ.

⁸ O mbufo etabi, enyuŋ ese nte Jehovah ɔfɔnde: ɔfɔfɔn ɔnɔ owo eke eberede idem ye enye.

⁹ Mbufo, nti ikɔt Jehovah, ebak enye: koro mmɔ eke ebakde enye

¹⁰ minanake baba ŋkpɔ kiet. Mme lion enana udia, enyuŋ etie biɔŋ: edi mmɔ eke eyomde Jehovah idinanake baba eti ŋkpɔ kiet.

¹¹ Mbufo nditɔwɔŋ, edi ekop uyo mi: nyeteme mbufo eteŋe Jehovah.

¹² Edi anie owo ke itɔŋ uwem ɔdɔŋ enye, ke ama ini eke okutde nti ŋkpɔ?

¹³ Kpeme edeme fo ke idiɔk, kpeme mkpɔk-inua fo ke abiaŋa.

¹⁴ Wɔŋɔre kpɔŋ idiɔk, nyuŋ nam eti: yom emem, nyuŋ bine enye.

¹⁵ Enyin Jehovah ese mbon eti ido, utɔŋ esie onyuŋ ɔbiɔŋɔ ɔnɔ eseme mmɔ.

¹⁶ Jehovah owuk iso ese mme anam-idiɔk, onyuŋ osibe se edade eti mmɔ ke ererimbot efep.

¹⁷ Mme nti owo eseme, ndien Jehovah okop, onyuŋ osio mmɔ ke kpukpru nnanenyin mmɔ.

¹⁸ Jehovah emekpere mmɔ eke esit ɔbuŋɔde mmɔ; onyuŋ anyaŋa mmɔ eke esit ɔduɔde.

¹⁹ Ediwak ukut esim eti owo; edi Jehovah osio enye ke mmɔ kpukpru.

²⁰ Enye ekpeme kpukpru mme ɔkpɔ esie: baba mmɔ kiet ibuŋɔke.

²¹ Idiɔk eyewot idiɔk owo: ndien mmɔ eke esuade mbon eti ido edue isop.

²² Jehovah afak ukpɔŋ ikɔt esie: ndien baba owo kiet eke eberede idem mmɔ ye enye, iduehe isop.