ŊWED MME PSALM 31 - Edisana ñwed Abasi Ibom

Akam Mbuɔridem Ke Abasi

Eke etubom mbon ikwɔ. Psalm David.

¹ MMƆBUƆT idem mi ye afo, O Jehovah; kuyak but anam mi ke nsinsi: yak mi mbɔhɔ, koro afo enende.

² Kpaŋ utɔŋ fo nɔ mi; wara di nyaŋa mi: di ɔkpɔsɔŋ itiat mi, ye edikoŋ ufɔk eke ekpemede mi.

³ Koro afo edide akwa itiat mi ye edikoŋ ufɔk mi; teme mi nsaŋa ke usuŋ, ndien, baŋa enyiŋ fo.

⁴ Sio mi ke iyire emi mmɔ edipde enɔ mi: koro afo edide odudu mi.

⁵ Nyeda spirit mi nsin fi ke ubɔk: Jehovah Abasi akpanikɔ, afo amafak mi.

⁶ Mmasua mmɔ eke etiŋde se idide ikpikpu ye nsu: ndien mbuɔt idem mi ye Jehovah.

⁷ Ima fo eyenem onyuŋ adat mi esit: emi afo okutde ukut mi; onyuŋ ɔfiɔkde ndutuhɔ esit mi;

⁸ ukonyuŋ uyakke mi usin mme asua mi ke ubɔk: edi omonim ukot mi ke akamba ufaŋ.

⁹ O Jehovah tua mi mbɔm, koro ntiede ke itie ukut: iyaresit ataha mi ke enyin, ye ukpɔŋ, ye idibi.

¹⁰ Koro uwem mi atahade ke iyaresit, isua mi enyuŋ etaha ke eseme: idiɔk ido mi anam odudu mi ofum; mme ɔkpɔ mi enyuŋ eyap.

¹¹ Kpukpru mme asua mi ekesin mi ndi ŋkpɔ ndek, akpan akpan mbɔhiduŋ mi; mme ɔdiɔŋɔ mi onyuŋ ese mi ke ŋkpɔ ndik: mmɔ eke ekutde mi ke aŋwa efehe ekpɔŋ mi.

¹² Mmɔ efre mi nte akpa-mkpa eke miduhe owo ke esit; mbiet usan eke akpade.

¹³ Koro ŋkopde mbia emi ediwak owo ebiade: ndik akan okuk; ke ini mmɔ edukde odu ebaŋa mi, mmɔ eyom usuŋ nte ebɔde mi uwem.

¹⁴ Edi ami mbuɔt idem mi ye afo, O Jehovah; ndɔhɔ nte, “Afo edi Abasi mi.”

¹⁵ Ini mi odu fi ke ubɔk: sio mi mme asua mi, ye mme andibine mi, ke ubɔk.

¹⁶ Nam iso fo ayama ɔnɔ owo fo: nyaŋa mi ke ima fo.

¹⁷ O Jehovah, kuyak but anam mi; koro nsemede nnɔ fi: yak mme idiɔk owo ekut but, yak mmɔ edop uyo ke obio ekpo.

¹⁸ Yak enam mkpɔk-inua nsu edop, emi edade iseri ye esuene edɔhɔ ɔkpɔsɔŋ ikɔ ye nti owo.

¹⁹ Ufɔn fo okpon didie emi afo onimde ɔnɔ mmɔ eke ebakde fi, onyuŋ anamde ɔnɔ mmɔ eke ebuɔtde idem mmɔ ye afo ke iso nditɔ owo!

²⁰ Afo eyedip mmɔ ke ebiet udibe ke iso fo, abak odu owo: eyefuk mmɔ ke ataya, abak utɔk mme edeme.

²¹ Yak ekɔm Jehovah, koro enye owutde mi utibe ima esie ke obio ibibene.

²² Edi kpa ami ŋkɔdɔhɔ ke ini ndik anamde mi, nte “Emesibe mi ke iso fo efep”; edi afo omokop uyo mkpe ubɔk mi ke ini nsemede nnɔ fi.

²³ O, mbufo ema Jehovah, kpukpru mbon-ima esie: Jehovah ekpeme mbon-akpanikɔ, onyuŋ osio usiene eti-eti ye mmɔ eke eseride iseri.

²⁴ Mbufo ekop uko, ndien enye eyesɔŋ mbufo esit, kpukpru mbufo emi edoride Jehovah enyin.