ŊWED MME PSALM 30 - Edisana ñwed Abasi Ibom

Akam Ekɔm ke Edinyaŋa nsio ke Nsobo

Psalm, ikwɔ ubere usuŋ ufɔk. Eke David.

¹ NYEKPONO fi, O Jehovah; koro afo emenerede mi onim ke enyɔŋ; ndien muyakke mme asua mi edat esit ebaŋa mi.

² O Jehovah, Abasi mi, ŋkeseme nnɔ fi, ndien afo anam udɔŋɔ okure mi.

³ O Jehovah, afo ekemenere ukpɔŋ mi osio ke udi: osio mi ke otu mmɔ eke esuhɔrede ke obube, onim ke uwem.

⁴ Ekwɔ enɔ Jehovah, mbufo mbon ima esie, enyuŋ etoro, ke etide edisana ido esie.

⁵ Koro enye ayatde esit ke ekpri ini; uwem oto ke mfɔn-ido esie: eyet eyedaŋ ke mbubreyo, ndien idara edi ke usenubɔk.

⁶ Ndien edi ami ŋkɔdɔhɔ ke ifure mi, nte, Ndisehekede ke nsinsi.

⁷ Jehovah, afo akanam akamba obot mi ɔsɔŋɔ ke ufɔn fo; afo okodip iso fo, ndien idem akpa mi.

⁸ Nyeseme nnɔ fi, O Jehovah;

⁹ nnyuŋ ŋkpe Jehovah ubɔk, nte, Nso udori odu ke iyip mi ke nsuhɔrede nduk ke udi? Nte ntan editoro fi? Nte enye editiŋ akpanikɔ fo?

¹⁰ O Jehovah, kop, nyuŋ tua mi mbɔm: Jehovah, di ŋwam mi.

¹¹ Afo amakabare itie-ikpo ɔnɔ mi esin ke unek: amatat mi ɔfɔŋ ikpo, omonyuŋ ada idaresit okune mi;

¹² man ubɔŋ ɔkwɔ fi, okunyuŋ odop. O Jehovah Abasi mi, nyetoro fi ke nsinsi.