ŊWED MME PSALM 3 - Edisana ñwed Abasi Ibom

Akam Usenubɔk Ndibuɔt Idem ye Abasi

Psalm David, adaŋemi enye efe-hede ke iso Absalom eyen esie.

¹ O JEHOVAH, mme andituk mi ewak didie! Mmɔ eke enamde ikɔ ye ami ke ewewak.

² Ediwak owo edɔhɔ ukpɔŋ mi ete, Abasi inyimeke ndinyaŋa enye [Selah.]

³ Ndien afo, Jehovah, edi otuekɔŋ eke akande mi okuk; ubɔŋ mi, ye andimenere ibuot mi ke enyɔŋ.

⁴ Nda uyo mi mfiori ŋkot Jehovah, Ndien enye etie ke edisana obot esie eyere mi. [Selah.]

⁵ Ami ŋkɔsuhɔre nna, nnyuŋ nde idap; ndemere; koro Jehovah omumde mi akama.

⁶ Ndifeheke mme tɔsin owo duop eke ekande mi ekuk enam ikɔ ye ami.

⁷ Daha ke enyɔŋ O Jehovah; nyaŋa mi, O Abasi mi: koro afo ama oyibi kpukpru mme asua mi ke mbaŋ; ama obuŋ mme idiɔk owo edet.

⁸ Erinyaŋa edi ŋkpɔ Jehovah; afo ɔmɔdiɔŋ ikɔt fo. [Selah.]