ŊWED MME PSALM 28 - Edisana ñwed Abasi Ibom

Akam Ndiyom Uŋwam Nto Abasi Nnyuŋ Ŋkɔm Enye ke Ibɔrɔ Akam

Eke David.

¹ NYEFIORI ŋkot fi, O Jehovah, akwa itiat mi; kudip mi uyo fo; mbak afo edidop, mi uyo fo, ndien ŋkabare mbiet mmɔ eke esuhɔrede ke obube.

² Kop uyo mkpe-ubɔk mi, ke adaŋemi nsemede nnɔ fi, ke mmenerede ubɔk mi nse edisana ebiet uyo fo.

³ Kududi mi ufep ye mme idiɔk owo, ye mme anam idiɔk, emi edɔhɔde ikɔ emem ye mbɔhɔiduŋ mmɔ, ndien idiɔk-ŋkpɔ odude mmɔ ke esit.

⁴ Nɔ mmɔ nte utom mmɔ ye mme idiɔk-ido mmɔ edide: nɔ mmɔ nte ubɔk mmɔ enamde; nam mmɔ ebeba.

⁵ Koro mmɔ mikereke utom Jehovah, ye se ubɔk esie enamde, enye eyewuri mmɔ; ndien idibɔpke mmɔ.

⁶ Mbufo ekɔm Jehovah, koro enye okokopde uyo mkpe-ubɔk mi.

⁷ Jehovah edi odudu mi, ye otu-ekɔŋ mi; esit mi ebere enye, ndien enye eyenyaŋa mi: esit mi onyuŋ adara; ndien nyeda ikwɔ mi ntoro enye.

⁸ Jehovah edi odudu mmɔ, enye onyuŋ edi ɔkpɔsɔŋ andinyaŋa Messiah esie.

⁹ Nyaŋa ikɔt fo, nyuŋ diɔŋ mbon udeme fo: bɔk mmɔ ŋko, nyuŋ menere mmɔ ke enyɔŋ ke nsinsi.