ŊWED MME PSALM 27 - Edisana ñwed Abasi Ibom

Jehovah Edi Uŋwana ye Edinyaŋa Mi

Psalm David.

¹ JEHOVAH edi uŋwana mi, ye erinyaŋa mi; ndifehe anie?

² Jehovah anam itɔŋ uwem ɔsɔŋ mi; ndibak anie? Ke ini mme anam idiɔk, kpa mbon usua mi ye mbon utɔk mi, esaŋade ekpere mi, ete ita obukidem mi, mmɔ efebede eduɔŋɔ.

³ Ekpedi eke mbon-ekɔŋ enamde nna-ekɔŋ ke ɔtɔ mi, esit mi idifeheke ndik: ekpedi eke ekɔŋ otibede oyom mi, nyebuɔt idem ke ŋkpɔ emi.

⁴ Mmebeŋe Jehovah ŋkpɔ kiet, ndien nyeyom enye; nte nduŋ ke ufɔk Jehovah ke ofuri uwem mi, man nse uyai Jehovah, nnyuŋ ntim mbup ke temple esie.

⁵ Koro enye eyefuk mi ke ataya esie ke usen idiɔk: eyedip mi ke ndibe ebiet iduŋ esie; onyuŋ emenere mi odori ke ebiet akwa itiat.

⁶ Ndien ke emi ke ibuot mi edikoŋ akan mme asua mi emi ekande mi ekuk: ndien nyewa uwa idara ke tent esie: nyekwɔ nnyuŋ ntoro Jehovah.

⁷ O Jehovah, kop! nyeseme ke uyo mi: tua mi mbɔm ŋko, nyuŋ yere mi.

⁸ (Ke ini afo ɔdɔhɔde, ete) “Mbufo eyom iso mi,” esit mi ɔdɔhɔ fi ete, “Nyeyom iso fo, O Jehovah.”

⁹ Kudip mi iso fo; kuda iyaresit ubin owo fo ufep: afo edi andinyaŋa mi; kumen mi uduɔk: kunyuŋ ukpɔŋ mi, O Abasi emi anyaŋade mi.

¹⁰ Koro ete mi ye eka mi ekekpɔŋde mi, ndien Jehovah emen mi akama.

¹¹ O Jehovah, teme mi usuŋ fo, nyuŋ da mi usuŋ eke enende baŋa mme asua mi.

¹² Kuda mi unɔ se mme asua mi emade: koro mme ntiense nsu ye mmɔ eke efimede afai enamde ikɔ ye ami.

¹³ Mikpedige nnimde ke akpanikɔ nte ke ndikut ufɔn Jehovah ke isɔŋ mme andidu uwem, (ŋkpatak).

¹⁴ Bet Jehovah: sɔŋ idem, ndien enye eyesɔŋ fi esit: tim bet Jehovah.