ŊWED MME PSALM 26 - Edisana ñwed Abasi Ibom

Akam Edinen owo

Psalm David.

¹ KPE ikpe mi, O Jehovah, koro nsaŋade ke mfɔn-mma mi: mmonyuŋ mbuɔt idem ye Jehovah; ndifebekede.

² O Jehovah, domo mi, nyuŋ se mi; duŋɔ ekput mi ye esit mi.

³ Koro ima fo odude mi ke iso: ndien nsaŋa ke akpanikɔ fo.

⁴ Ami ntiehe ye mbon nsu; nnyuŋ nsaŋake ye mbon mbubik.

⁵ Mmasua esop mme anam idiɔk, ndinyuŋ ntiehe ye mme oburobut owo.

⁶ Nyeyet ubɔk mi esana: ndien nyekanare itie-uwa fo ŋkuk,

⁷ O Jehovah: man nda uyo ekɔm ŋkwɔrɔ, nnyuŋ mbuk kpukpru mme utibe ŋkpɔ fo.

⁸ O Jehovah, mmama iduŋ ufɔk fo, ye ebiet emi ubɔŋ fo oduŋde.

⁹ Kumen ukpɔŋ mi ufep udian ye mme idiɔk owo, kunyuŋ udian

¹⁰ uwem mi ye mbon afai; emi mme oburobut ido edude mmɔ ke ubɔk, inyene ndop-inua onyuŋ ɔyɔhɔ mmɔ ke ubɔk nnasia.

¹¹ Ndien ami nyesaŋa ke mfɔn-mma mi: fak mi, nyuŋ tua mi mbɔm.

¹² Ukot mi kada ke una-isɔŋ: nyekɔm Jehovah ke otu mbon-esop.