ŊWED MME PSALM 25 - Edisana ñwed Abasi Ibom

Akam Ndausuŋ, Edidahado ye ukpeme

Eke David.

¹ O JEHOVAH? nyemenere ukpɔŋ mi nse fi.

² Abasi mi mmɔbuɔt idem mi ye afo; kuyak mi ŋkut but; kuyak mme asua mi edat esit ebaŋa mi.

³ Kuyak baba owo mmɔ kiet eke ebetde fi okut but: nam mmɔ eke ebiaŋade ke ikpikpu ekut but.

⁴ Wut mi usuŋ fo, O Jehovah; teme mi ido fo.

⁵ Nam mi nsaŋa ke akpanikɔ fo, nyuŋ teme mi: koro afo edide Abasi erinyaŋa mi; mmebet fi ofuri usen.

⁶ Ti mbɔm fo, ye ima fo, O Jehovah, koro mmɔ edide nsinsi.

⁷ Kuti mme idiɔk ido uyen mi, ye mme ukwaŋ-ŋkpɔ mi: afo, O Jehovah, ti mi, nte ima fo asaŋade, baŋa mfɔn fo.

⁸ Jehovah ɔfɔn onyuŋ enen: mmɔdo enye eyeteme mme idiɔk owo usuŋ.

⁹ Enye eyenam mbon nsukidem esaŋa ke erinen: onyuŋ eteme mbon nsukidem usuŋ esiemɔ.

¹⁰ Kpukpru usuŋ Jehovah edi ima ye akpanikɔ enɔ mmɔ eke ekpemede ediomi esie ye ikɔ ntiense esie.

¹¹ Dahado ntem ke ndudue mi koro okponde, baŋa enyiŋ fo, O Jehovah.

¹² Edi anie owo abak Jehovah? Enye eyeteme enye usuŋ eke emekde.

¹³ Ukpɔŋ esie eyeduŋ ke mfɔn; ubon esie eyenyuŋ eda isɔŋ enyene.

¹⁴ Jehovah etie ufan ye mmɔ eke ebakde enye, ndien enye eyeteme mmɔ ediomi esie.

¹⁵ Enyin mi osuk ese Jehovah kpukpru ini: koro edi enye edisio ukot mi ke iyire.

¹⁶ Kabare se mi, nyuŋ tua mi mbɔm: koro ami ntiede ikpɔŋ ke nnanenyin.

¹⁷ Ndutuhɔ esit mi omokpon: sio mi ke nnanenyin mi.

¹⁸ Se ukut mi, ye afanikɔŋ mi; nyuŋ dahado ke kpukpru mme idiɔk ido mi.

¹⁹ Se mme asua mi, koro mmɔ ewakde; ndien mmɔ esua mi ata ɔkpɔsɔŋ usua.

²⁰ Kpeme ukpɔŋ mi, nyuŋ nyaŋa mi: kuyak but anam mi; koro mmɔbuɔt idem mi ye afo.

²¹ Mfɔn-mma ye eti ido eyekpeme mi; koro ntiede mbet fi.

²² O Abasi, fak Israel sio ke kpukpru ndutuhɔ esie.