ŊWED MME PSALM 22 - Edisana ñwed Abasi Ibom

Eyet Mbuŋɔ-Esit ye Ikwɔ Itoro

Eke etubom mbon ikwɔ abaŋa ebet usenubɔk. Psalm David.

¹ ABASI mi! Abasi mi! nsiman afo ɔkpɔŋde mi? nsinam afo adade anyan ebiet, munyaŋake mi, mukopke uyo eseme mi?

² O Abasi mi, nseme ke uwemeyo, ndien afo uyereke; nseme ke okoneyo, ndien idige nte ndopde uyo.

³ Ndien afo edi edisana, ke oduŋ ke otu itoro Israel.

⁴ Mme ete nnyin ekebuɔt idem mmɔ ye afo: mmɔ ebuɔt idem, ndien afo anyaŋa mmɔ.

⁵ Mmɔ efiori ekot fi, ndien ebɔhɔ: ebuɔt idem ye afo, ndien ikwe but.

⁶ Ndien ami ndi utuŋ, ndige owo; ndi se ererimbot esuenede, se kpukpru owo enyuŋ esede ke ndek.

⁷ Kpukpru owo eke ekutde mi esak mi nsahi: mmɔ emik inua enyuŋ eyip ibuot.

⁸ “Beredem ke Jehovah.” Enye eyenam enye ɔbɔhɔ: eyenyaŋa enye, koro amade enye.

⁹ Koro edi afo okosio mi ke itie-eyen: afo anam mi mbere ke eba eka mi ke ifure.

¹⁰ Ke ini oro ŋkamanade eduɔk mi enɔ fi: afo edi Abasi mi, ɔtɔŋɔde ke idibi eka mi.

¹¹ Kukpɔŋ mi anyan usuŋ; koro nnanenyin ekperede; koro owo eke anyaŋade miduhe.

¹² Ediwak nyara enaŋ ekan mi ekuk; mkpɔsɔŋ enaŋ Bashan ekan mi ekuk.

¹³ Mmɔ eŋwaŋade inua mmɔ ese mi, nte lion eke awaide onyuŋ okunide.

¹⁴ Eŋwaŋa mi nte mmɔŋ; kpukpru mme ɔkpɔ mi efebede ŋko; esit mi atara nte mbukpa ɔkwɔk ke ufɔt nsia mi.

¹⁵ Nsɔŋidem mi amasat nte mkpasip usiɔŋ; edeme mi adiana mi ke mbaŋ ŋko; afo eyenyuŋ ada mi esin ke ntan mkpa.

¹⁶ Koro ebua ekande mi ekuk: otu mme oburobut owo ekan mi ekuk: ekim mi ubɔk ye ukot.

¹⁷ Mbat kpukpru ɔkpɔ mi: mmɔ ewuk enyin ese mi.

¹⁸ Mmɔ edeme edisine-ŋkpɔ mi ke idem mmɔ, enyuŋ esin afia ebaŋa ɔfɔŋ idem mi.

¹⁹ Edi afo, O Jehovah, kuda nsannsan: odudu mi, men idem, di nyaŋa mi.

²⁰ Nyaŋa ukpɔŋ mi sio ke ofut; sio ikpɔk idem mi ke ubɔk mme ebua.

²¹ Nyaŋa mi sio ke inua lion, afo eyere mi ke nduk editim.

²² Nyebuk enyiŋ fo nnɔ nditɔ-ete mi: nyetoro fi ke ufɔt mbon-esop.

²³ Mbufo emi ebakde Jehovah, ekwɔ enye; kpukpru ubon Jacob, ekpono Enye; kpukpru ubon Israel eteŋe Enye.

²⁴ Koro Enye misinke ukut owo ukut ke ndek, minyuŋ isuaha; minyuŋ idipke enye iso esie; edi okop, ke ini enye esemede ɔnɔ enye.

²⁵ Itoro mi eyeto fi ke akamba esop: nyesio akaŋa mi ke iso mmɔ eke ebakde enye.

²⁶ Mbon nsukidem eyedia eyuhɔ: mmɔ eke eyomde Jehovah eyetoro Enye: yak esit mbufo odu uwem ke nsinsi.

²⁷ Kpukpru mme utit ererimbot eyeti, enyuŋ ekabare etiene Jehovah: kpukpru ufɔk mme idut eyenyuŋ etuak ibuot enɔ fi.

²⁸ Koro itie ubɔŋ enyenede Jehovah: enye onyuŋ akara ekondo.

²⁹ Kpukpru ikpɔ owo ererimbot eyedia, enyuŋ etuak ibuot: kpukpru mmɔ eke esu-hɔrede ke ntan eyenuhɔ ke iso esie: ye owo eke minimke uwem esiemɔ.

³⁰ Ubon (efen) eyenam ŋkpɔ esie; eyebuk (emi) ebaŋa Ɔbɔŋ enɔ emana eŋwen.

³¹ Mmɔ eyedi editiŋ eti ido esie enɔ mbio eke edimanade, ete ke enye ama anam.