ŊWED MME PSALM 20 - Edisana ñwed Abasi Ibom

Ndibeŋe Abasi Edikan

Eke etubom mbon ikwɔ. Psalm David.

¹ YAK Jehovah akam eyere fi ke usen ukut! yak enyiŋ Abasi Jacob ekpeme fi.

² Etie ke edisana iduŋ ɔdɔŋ edinyaŋa fi, onyuŋ etie ke Zion omum fi akama.

³ Eti kpukpru inuak-udia fo, onyuŋ ese edifɔp uwa fo ke edifɔn. [Selah.]

⁴ Ɔnɔ fi se esit fo amade, onyuŋ anam ofuri uduak fo.

⁵ Nnyin iyedara erinyaŋa fo, inyuŋ imenere banner nnyin ke enyiŋ Abasi nnyin: yak Jehovah osuk anam kpukpru se afo ebeŋede.

⁶ Ke emi ke mfiɔk nte ke Jehovah anyaŋa Messiah esie; eyetie ke edisana heaven esie eyere enye, ke odudu erinyaŋa ubɔk nnasia esie.

⁷ Ndusuk ebure ke chariot, ndusuk ke horse: edi nnyin iyebure ke enyiŋ Jehovah Abasi nnyin.

⁸ Mmɔ ebeŋere eduɔŋɔ: edi nnyin idaha ke enyɔŋ ineŋere ida.

⁹ O Jehovah, nyaŋa! yak edidem eyere nnyin ke usen eke nnyin isemede.