ŊWED MME PSALM 19 - Edisana ñwed Abasi Ibom

Ubɔŋ Abasi Emi Obotde kpukpru Ŋkpɔ ye Ibet Esie

Eke etubom mbon ikwɔ. Psalm David.

¹ MME heaven ke ebuk ubɔŋ Abasi, ikpa-enyɔŋ onyuŋ etiŋ se ubɔk esie anamde.

² Uwemeyo eneme ye uwemeyo, okoneyo onyuŋ eteme okoneyo ifiɔk.

³ Nneme iduhe, ikɔ inyuŋ iduhe, inyuŋ ikopke uyo mmɔ baba.

⁴ Uruk mmɔ ɔmɔwɔrɔ ke ofuri ererimbot, se mmɔ etiŋde omonyuŋ osim utit ekondo. Enye omowuk mmɔ tent ke esit ɔnɔ utin.

⁵ Ndien enye ebiet ɔdɔ-ndɔ emi otode ke ubet esie ɔwɔrɔ, adara nte owo uko ke erifehe mbuba esie.

⁶ Enye ɔwɔrɔ ke utit ikpa-enyɔŋ kiet, onyuŋ akan akabare ke utit esie eken: baba ŋkpɔ kiet eke odibede ufiop esie inyuŋ iduhe.

⁷ Ido Jehovah efɔn ema, edemere ukpɔŋ; item Jehovah edi akpanikɔ, asian mme ɔkɔi.

⁸ Mme ewuhɔ Jehovah enen, edat owo esit; mbet Jehovah eyama, eŋwaŋa owo enyin.

⁹ Uteŋe Jehovah asana, odu ke nsinsi: mme ikpe Jehovah edi akpanikɔ, kpukpru mmɔ enen.

¹⁰ Mmɔ edi se owo ekpeyomde ekan gold ye ata ediwak eti gold, enyuŋ eniŋe ekan aran-ɔkwɔk eke mbukpa ɔtɔide.

¹¹ Enyuŋ eda mmɔ eteme owo fo; akamba udori oto ke erinim mmɔ.

¹² Anie ekeme ndidiɔŋɔ ndudue esiemɔ? Nam mi nsana mbɔhɔ mmɔ eke edibede.

¹³ Mum owo fo kama, mbak ŋkoi-nnam; kuyak mmɔ ekan mi: ndien nyefɔn mma, nnyuŋ nsana mbɔhɔ ikpɔ mme idiɔk ido.

¹⁴ Ndien ikɔ inua mi, ye ekikere esit mi eyenem fi esit, O Jehovah, akwa itiat mi, ye andifak mi.