ŊWED MME PSALM 17 - Edisana ñwed Abasi Ibom

Akam Ukpeme ke Ini Ukɔbɔ

Akam David.

¹ JEHOVAH, kop se inende, kpaŋ utɔŋ ke eseme mi; biɔŋ utɔŋ nɔ akam mi emi mitoho ke mkpɔk-inua nsu.

² Yak ikpe mi oto fi ke iso; yak enyin fo ese ŋkpɔ eke enende.

³ Afo omodomo esit mi; emese mi ke okoneyo; omodomo mi; ukwe ŋkpɔ; inua mi ibehe ekikere mi.

⁴ Ama edi se owo anamde, ami nda ikɔ mkpɔk-inua fo ŋkpeme mme usuŋ owo

⁵ Ukot mi emum usuŋ fo ekama, ikpat mi ifiɔnɔkede.

⁶ Mmeseme nnɔ fi, koro afo eyeyere mi, O Abasi: kpaŋ utɔŋ fo nɔ mi, kop uyo mi.

⁷ Nam ima fo edi utibe, afo emi adade ubɔk nnasia fo anyaŋa mmɔ eke ebuɔtde idem osio ke ubɔk mmɔ eke enamde ikɔ ye mmɔ.

⁸ Kpeme mi nte eyen enyin, fuk mi ke mfut mba fo,

⁹ mbak mme idiɔk owo eke esobode mi; mme asua eke enuakde mi itɔŋ uwem eyekan mi ekuk.

¹⁰ Ikpɔŋ mmɔ ɔfuhɔ mmɔ: mmɔ edɔhɔ iseri-iseri ke inua mmɔ.

¹¹ Mmɔ emekan nnyin ke ikpat isaŋ nnyin ke emi ekuk: eyewuk enyin mmɔ, ete iwaha ke isɔŋ.

¹² Enye ebiet lion, itɔŋ uwai ŋkpɔ ɔdɔŋ enye; ebiet abak lion, etie ke ebiet udibe.

¹³ Dada ke enyɔŋ O Jehovah, biɔŋɔ enye ke iso, men enye duɔk ke isɔŋ: da ofut fo nam ukpɔŋ mi ɔbɔhɔ mme idiɔk owo:

¹⁴ da ubɔk fo. O Jehovah, (nam mi mbɔhɔ) owo, kpa ererimbot emi udeme mmɔ odude ke uwem emi, afo eyenyuŋ ada nti ŋkpɔ fo ɔyɔhɔ mmɔ ke idibi: nditɔ eyeyuhɔ mmɔ; ndien mmɔ eyenim nsuhɔ mmɔ enɔ nditɔwɔŋ mmo.

¹⁵ Ami nyese iso fo ke eti ido; mbiet fo eyeyuhɔ mi ke ini ndemerede.