ŊWED MME PSALM 16 - Edisana ñwed Abasi Ibom

Akam Ukpeme ye Nsɔŋɔ Nda

Michtam David.

¹ KPEME mi, O Abasi, koro mmɔbuɔt idem ye afo.

² Ukpɔŋ mi, afo ɔmɔdɔhɔ Jehovah, ete, Afo edi Ɔbɔŋ mi;

³ se ifɔnde ye ami ibehe fi. Kpa ntre ye ndisana owo emi edude ke isɔŋ, ye ata nti owo emi ofuri idaresit mi otode mmɔ.

⁴ Ukut mmɔ awak: mmɔ etiene (Abasi) eŋwen: ndiŋwaŋke ediŋwɔŋ uwa iyip mmɔ, ndinyuŋ mmenke enyiŋ mmɔ nsin ke inua mi.

⁵ Jehovah edi udeme mi, ye cup mi: afo omum afia mi akama.

⁶ Mme uruk emeduɔ enɔ mi ke edifɔn ebiet, udeme mi emeye ŋko-ŋko.

⁷ Nyekɔm Jehovah emi ɔnɔde mi item: esit mi ŋko eteme mi ke ini okoneyo.

⁸ Mmonim Jehovah ke iso mi kpukpru ini: koro enye odude mi ke ubɔk nnasia, ndisehekede.

⁹ Mmɔdo esit adatde mi, ubɔŋ mi onyuŋ ebre; obukidem mi eyenyuŋ etie ke ifure.

¹⁰ Koro afo mudukpɔŋke ukpɔŋ mi ke obio ekpo; uduyakke owo ima fo okut mbiara.

¹¹ Afo eyewut mi usuŋ uwem: uyuhɔ idaresit ke iso fo; ŋkpɔ inemesit ke ubɔk nnasia fo ke nsinsi.