ŊWED MME PSALM 149 - Edisana ñwed Abasi Ibom

Etoro Abasi Emi Ɔfɔnde Ido ye Israel

¹ MBUFO etoro Jehovah. Ekwɔ obufa ikwɔ enɔ Jehovah, ekwɔ itoro esie ke otu esop mbon-ima esie.

² Yak Israel adat esit abaŋa andibot enye: yak nditɔ Zion ebre ebaŋa edidem mmɔ.

³ Yak mmɔ etoro enyiŋ esie ke unek: emen ekɔmɔ ye harp ebre enɔ enye.

⁴ Koro ikɔt Jehovah enemde enye esit: enye ada erinyaŋa abana mbon nsuk-esit.

⁵ Yak mbon-ima (Abasi) edara ke ubɔŋ: enyuŋ ena ke mbri mmɔ ekwɔ ikwɔ.

⁶ Itoro Abasi odu mmɔ ke inua, ofut iso iba onyuŋ odu mmɔ ke ubɔk;

⁷ man esio usiene ke otu mme idut, enɔ mme obio ufen.

⁸ Man ekɔbi ndidem mmɔ ke ŋkpɔkɔbi, ye mbɔŋ mmɔ ke ebuka ukwak;

⁹ man ekpe ikpe ke otu mmɔ kpa nte ewetde: kpukpru mbon-ima (Abasi) enyene ukpono emi. Mbufo etoro Jehovah.