ŊWED MME PSALM 148 - Edisana ñwed Abasi Ibom

Ofuri Ererimbot Etoro Abasi

¹ MBUFO etoro Jehovah. Etie ke heaven etoro Jehovah; etoro enye ke enyɔŋ.

² Mbufo, kpukpru angel esie, etoro enye; kpukpru mme udim esie etoro enye.

³ Utin ye ɔfiɔŋ, mbufo etoro enye: kpukpru ntantafiɔŋ uŋwana, etoro enye.

⁴ Etoro enye, mbufo ata enyɔŋ, ye mmɔŋ emi odorode ke ikpa-enyɔŋ.

⁵ Yak mmɔ etoro Jehovah: koro enye okowukde, ndien mmɔ eboro:

⁶ enye onyuŋ anam mmɔ ebigi ke nsinsi-nsinsi: enye owuk ewuhɔ: ndien mmɔ ibiatke.

⁷ Mbufo mme dragon, ye kpukpru udem, etie ke isɔŋ etoro Jehovah.

⁸ Ikaŋ ye edim-itiat; snow, ye ntuhube; ye oyobio emi enamde uyo esie.

⁹ Ikpɔ obot, ye kpukpru ŋkpri obot; eto mfri, ye kpukpru mme cedar; mme unam ikɔt,

¹⁰ ye kpukpru ufene; mme andinyɔni, ye inuen mba: ndidem ererimbot,

¹¹ ye kpukpru mme idut; mbɔŋ; ye kpukpru mme ebierikpe ererimbot.

¹² Mkparawa, ye nditɔ-iban; ŋkani iren, ye nditɔwɔŋ:

¹³ yak mmɔ etoro enyiŋ Jehovah: koro enyiŋ esie ikpɔŋ-ikpɔŋ okoŋde; ubɔŋ esie emenere akan isɔŋ ye enyɔŋ.

¹⁴ Enye omonyuŋ emenere nduk ikɔt esie onim ke enyɔŋ, ye itoro ofuri mbon-ima esie; kpa eke nditɔ Israel, mbon emi ekperede enye.