ŊWED MME PSALM 147 - Edisana ñwed Abasi Ibom

Etoro Abasi Emi Ekerede Abaŋa Jerusalem

¹ MBUFO etoro Jehovah, koro ɔfɔnde ndikwɔ Abasi nnyin; koro enende; itoro onyuŋ eye.

² Edi Jehovah ɔdiɔŋ Jerusalem: enye ataŋ nditɔ Israel emi ebinde mmɔ efep, obon.

³ Edi enye ɔkɔk mmɔ eke esit mmɔ anuahade, onyuŋ ofuk mmɔ unan.

⁴ Edi enye abat ibat ntantafiɔŋ; onyuŋ osio mmɔ kpukpru enyiŋ.

⁵ Ɔbɔŋ nnyin omokpon, omonyuŋ ɔsɔŋ odudu: ifiɔk esie akan nte owo obukde.

⁶ Jehovah emenere mbon nsukesit onim ke enyɔŋ: emen mme idiɔk owo ɔduɔk ke isɔŋ.

⁷ Mbufo eda ikwɔ-ekɔm ekwɔ enɔ Jehovah; ebre enɔ Abasi nnyin ke harp:

⁸ emi adade obubit enyɔŋ ofuk ikpa-enyɔŋ, emi ɔkɔde edim ɔnɔ isɔŋ, emi anamde obot etibe mbiet.

⁹ Emi ɔnɔde unam udia esie, onyuŋ ɔnɔ nditɔ raven eke etuaŋade.

¹⁰ Nsɔŋidem horse idatke enye esit, mme ukot owo inyuŋ inemke enye.

¹¹ Mmɔ eke ebakde Jehovah, ye mmɔ eke edoride enyin ke ima esie, enem enye esit.

¹² O Jerusalem, kɔm Jehovah; O Zion, kɔm Abasi fo.

¹³ Koro enye anamde mme eto-usin-usuŋ fo esɔŋɔ; onyuŋ ɔdiɔŋ nditɔ fo ke ufɔt fo.

¹⁴ Enye onim mme adaŋa fo emem, ɔnɔ fi ata eti wheat ɔyuhɔ.

¹⁵ Ɔdɔŋ ikɔ esie utom ke isɔŋ: uyo esie ɔsɔp ukot eti-eti.

¹⁶ Emi ɔnɔde snow nte idet erɔŋ; onyuŋ awari hoar-frost nte ntɔŋ.

¹⁷ Emi ɔduɔkde edim itiat esie nte ŋkeŋe udia: anie ekeme ndida ke iso tuep esie?

¹⁸ Emi ɔdɔŋde ikɔ esie utom, onyuŋ anam mmɔ etara; anam ofum esie abara, ndien mmɔŋ asaŋa.

¹⁹ Emi etiŋde ikɔ esie ɔnɔ Jacob; etiŋ mme ewuhɔ esie ɔnɔ Israel.

²⁰ Enye ikanamke ntem ye baba idut kiet: ndien ama edi mme ikpe esie, mmɔ ifiɔkke mmɔ. Mbufo etoro Jehovah.