ŊWED MME PSALM 146 - Edisana ñwed Abasi Ibom

Etoro Abasi ke Mme Nti Edinam Esie

¹ MBUFO etoro Jehovah. Ukpɔŋ mi, toro Jehovah.

² Nyetoro Jehovah ke ofuri uwem mi; nyebre nnɔ Abasi mi adaŋa ini nte ndidude uwem.

³ Mbufo ekubuɔt idem ye mbɔŋ, ekubuɔt ye eyen owo, emi erinyaŋa miduhe enye ke idem.

⁴ Ibifik ɔwɔrɔ enye ke idem, enye afiak ke ntan esie; ke kpasuk usen oro mme uduak esie etak.

⁵ Ɔfɔfɔn ɔnɔ owo eke Abasi Jacob edide andiŋwam enye, eke odoride enyin ye Jehovah Abasi esie:

⁶ emi akanamde enyɔŋ, ye isɔŋ, inyaŋ, ye kpukpru se idude mmɔ ke esit: emi onimde akpanikɔ ke nsinsi:

⁷ emi ekpede ikpe ɔnɔ mmɔ eke etuhɔde; onyuŋ ɔnɔde mbon ɔbiɔŋ udia. Jehovah ɔkpɔhɔre mbon ŋkpɔkɔbi:

⁸ Jehovah atat mbon nnanenyin: Jehovah emenere mmɔ eke enu-hɔde: Jehovah ama mbon edinen ido:

⁹ Jehovah ekpeme isen owo; enye emenere eyen-akpa ye ebe-akpa onim ke enyɔŋ: onyuŋ akwaŋa usuŋ mme idiɔk owo.

¹⁰ Jehovah edi edidem ke nsinsi; Abasi fo, O Zion, ke ofuri emana. Mbufo etoro Jehovah.