ŊWED MME PSALM 145 - Edisana ñwed Abasi Ibom

Etoro Abasi ke Mfɔnido ye Odudu Esie

Itoro. Eke David.

¹ NYEKPONO fi, O Abasi mi edidem; nnyuŋ ŋkɔm enyiŋ fo ke nsinsi.

² Nyekɔm fi ke kpukpru usen; nnyuŋ ntoro enyiŋ fo ke nsinsi-nsinsi.

³ Jehovah omokpon, onyuŋ odot nte etorode enye eti-eti; inyuŋ idige nte etimde eduŋɔre ubɔŋ esie.

⁴ Ofuri emana eyetoro se afo anamde, enyuŋ etaŋa ese fo.

⁵ Nyetie ŋkere uyai ubɔŋ ubom fo, ye ikɔ mme utibe ŋkpɔ fo.

⁶ Ndien mmɔ eyedɔhɔ ebaŋa odudu ŋkpɔ ndik fo: ndien ama edi ubom fo, nyebuk enye.

⁷ Mmɔ eneme ebaŋa nte etide akwa ufɔn fo, enyuŋ ekwɔ eti ido fo.

⁸ Jehovah enyene esit ufɔn ye mbɔm: isɔpke iyaresit, edi okpon ima.

⁹ Jehovah ɔfɔfɔn ye kpukpru: esit mbɔm esie onyuŋ ofuk kpukpru se enye anamde.

¹⁰ O Jehovah, kpukpru se afo anamde ekɔm fi: mbon-ima fo enyuŋ etoro fi.

¹¹ Mmɔ ebuk ubom ubɔŋ fo, enyuŋ etiŋ ebaŋa odudu fo.

¹² Enyuŋ enam nditɔ owo efiɔk ese esie, ye ubom uyai ubɔk esie.

¹³ Ubɔŋ fo edi ata nsinsi ubɔŋ, afo onyuŋ akara ke ofuri emana.

¹⁴ Edi Jehovah omum mmɔ eke eduɔŋɔde, akama, onyuŋ emenere mmɔ eke enuhɔde.

¹⁵ Enyin kpukpru ŋkpɔ ese fi ebet; ndien afo osuk ɔnɔ mmɔ udia mmɔ ke edikem ini.

¹⁶ Afo atat ubɔk fo, onyuŋ ɔnɔ kpukpru mme andidu uwem se mmɔ emade, eyuhɔ.

¹⁷ Jehovah emenen ke kpukpru usuŋ esie, onyuŋ ɔfɔn ido ke kpukpru se enye anamde.

¹⁸ Jehovah emekpere kpukpru mmɔ eke esemede enɔ enye, kpukpru mmɔ eke esemede enɔ enye ke akpanikɔ.

¹⁹ Enye eyenam se mme andibak enye emade: onyuŋ okop eseme mmɔ, onyuŋ anyaŋa mmɔ.

²⁰ Jehovah ekpeme kpukpru mmɔ eke emade enye: onyuŋ osobo kpukpru mme idiɔk owo.

²¹ Inua mi eyetiŋ itoro Jehovah: ofuri obukidem eyenyuŋ ɔkɔm edisana enyiŋ esie ke nsinsi-nsinsi.