ŊWED MME PSALM 144 - Edisana ñwed Abasi Ibom

Ndibeŋe Abasi Edifak ye Uforo

Eke David.

¹ EKƆM Jehovah akwa itiat mi, emi etemede ubɔk mi ekɔŋ; eteme nnuenubɔk mi eŋwan.

² Ima mi ye ɔkpɔsɔŋ ubɔhɔ mi; edikoŋ ufɔk mi emi anamde mi mbɔhɔ; otu-ekɔŋ mi, emi nnyuŋ mmbuɔtde idem mi ye enye; emi anamde ikɔt mi esuk ibuot enɔ mi.

³ Jehovah, owo edi nso ŋkpɔ eke afo ɔdiɔŋɔde enye? eyen owo edi nso eke afo edikerede enye?

⁴ Owo ebiet ikpikpu: eyo esie etie nte ukpɔŋ eke ebede ɔnyɔŋ.

⁵ O Jehovah, nuk ikpa-enyɔŋ fo, nyuŋ suhɔre: tuk ikpɔ obot, ndien mmɔ eyewɔrɔ nsuŋikaŋ.

⁶ Duɔk obuma nyuŋ suan mmɔ: tiga idaŋ fo, nam mmɔ ebuŋɔ kip.

⁷ Tie ke enyɔŋ nyan ubɔk fo; fabare mi nyuŋ sio mi ke akwa mmɔŋ, ye ke ubɔk nditɔ esen owo;

⁸ emi inua mmɔ osude nsu, ubɔk nnasia mmɔ onyuŋ edi nnasia abiaŋa.

⁹ O Abasi, nyekwɔ obufa ikwɔ nnɔ fi: nyeda ndido uruk duop mbre nnɔ fi;

¹⁰ emi ɔnɔde edidem erinyaŋa: emi afabarede David owo esie efep, osio idiɔk ofut ke ubɔk.

¹¹ Fabare mi, nyuŋ sio mi fep ke ubɔk nditɔ idut, emi inua mmɔ esude nsu, ubɔk nnasia mmɔ onyuŋ edi nnasia abiaŋa.

¹² Man nditɔ-iren nnyin ebiet nsehe eto, eke ekponide ke uyen mmɔ; man nditɔ nnyin iban enyuŋ ebiet itiat inuk eke esɔide, man eda ebɔp temple:

¹³ man mme unim udia nnyin eyɔhɔ, enɔ ŋkpɔ ke oruk, ke oruk: man ŋkpri ufene nnyin eman tɔsin ata ediwak ke iŋwaŋ nnyin:

¹⁴ man enaŋ nnyin ebiom mbiomo eti-eti; baba ŋkpɔ kiet okubiara, okunyuŋ osop; baba eseme okunyuŋ odu ke aŋwa nnyin.

¹⁵ Ɔfɔfɔn ɔnɔ mbon eke etiede ntem: ɔfɔfɔn ɔnɔ mbon eke Jehovah edide Abasi mmɔ.