ŊWED MME PSALM 143 - Edisana ñwed Abasi Ibom

Ndibeŋe Abasi Uŋwam ye Edinyaŋa ye Ndausuŋ

Psalm David.

¹ O JEHOVAH, kop akam mi, kpaŋ utɔŋ ke mkpeubɔk mi: yere mi ke akpanikɔ fo, ye ke edinen ido fo.

² Kunyuŋ ukot owo fo ikpe: koro ikpe misanake baba andidu uwem kiet ke iso fo.

³ Koro usua ebinede ukpɔŋ mi; edigi uwem mi adian ke ntan; anam mi ntie ke edikim ebiet, kpa nte mme akpa-mkpa eset.

⁴ Ndien spirit mi ɔmɔfuhɔ mi ke idem; esit akpa mi ke idem.

⁵ Mmeti eyo oko; mmese ofuri utom fo; mmetie ŋkere se ubɔk fo ekenamde.

⁶ Mmenere ubɔk mi nnɔ fi: ukpɔŋ mi etie nte isɔŋ mmemidem oyom fi. [Selah]

⁷ O Jehovah, wawara yere mi: spirit akpa mi: kudip mi iso fo, mbak ndibiet mmɔ eke esuhɔrede ke obube.

⁸ Nam ŋkop ima fo ke usenubɔk: koro mbuɔtde idem mi ye afo: wut mi usuŋ eke ŋkpasaŋade; koro mmenerede ukpɔŋ mi nse fi.

⁹ O Jehovah, nyaŋa mi sio mme asua ke ubɔk: nnyɔŋ ndi ke ɔtɔ fo ndidibe.

¹⁰ Teme mi ndinam se afo amade: koro afo edide Abasi mi: spirit fo ɔmɔfɔn, yak enye ada mi aka ke isɔŋ edinen ido.

¹¹ O Jehovah, nam itɔŋ uwem ɔsɔŋ mi, baŋa enyiŋ fo: da edinen ido fo sio ukpɔŋ mi ke nnan-enyin.

¹² Ndien afo eyeda ima fo ekpeŋe mme asua mi, onyuŋ osobo kpukpru mme asua ukpɔŋ mi: koro ami ndide owo fo.