ŊWED MME PSALM 142 - Edisana ñwed Abasi Ibom

Ndibeŋe Abasi Uŋwam ke Ini Afanikɔŋ

Maschil David; ke adaŋemi enye odude ke aba itiat; akam.

¹ MFIORI ŋkot Jehovah ke uyo mi; nda uyo mi ŋkpe Jehovah ubɔk.

² Ŋwaŋa ekikere mi ke iso esie; mbuk ukut mi ke iso esie.

³ Ke ini spirit mi etiede ke mfuhɔ, ndien afo ɔfiɔk isaŋ mi. Mmɔ emekɔk afia enɔ mi ke usuŋ emi nsaŋade.

⁴ Kabare ke nnasia, nyuŋ se, ndien baba owo kiet eke ɔdiɔŋɔde mi iduhe; ubɔhɔ mi amatak; baba owo kiet eke ekerede ukpɔŋ mi iduhe.

⁵ Nseme ŋkot fi, O Jehovah: ndɔhɔ nte ke afo edi ubɔhɔ mi, ye udeme mi ke isɔŋ mme andidu uwem.

⁶ Tiŋ enyin ke eseme mi: koro idem ememde mi eti-eti. Nyaŋa mi sio mme andikɔbɔ mi ke ubɔk: koro mmɔ esɔŋde ekan mi.

⁷ Sio ukpɔŋ mi ke ufɔk ukwak, man ŋkɔm enyiŋ fo: nti owo eyekan mi ekuk; koro afo edifɔnde ye ami.