ŊWED MME PSALM 140 - Edisana ñwed Abasi Ibom

Ndiyom Ukpeme Abasi ke Ini Ukɔbɔ

Eke etubom mbon ikwɔ. Psalm David.

¹ O JEHOVAH, nyaŋa mi sio idiɔk owo ke ubɔk: kpeme mi mbak mbon afai;

² emi eduakde idiɔk uduak ke esit: mmɔ esop idem ofuri usen ebaŋa ekɔŋ.

³ Mmɔ eban edeme mmɔ kpa nte urukikɔt: ifɔt ibɔm odu mmɔ ke idak mkpɔk-inua. [Selah.]

⁴ O Jehovah, nim mi mbak ubɔk idiɔk owo; kpeme mi mbak mbon afai, emi eduakde ndinuk ikpat mi efebede.

⁵ Mbon iseri emedip afai ye uruk enɔ mi; emekɔbi mukanda ke mben usuŋ; emekɔk mfine esin enɔ mi.

⁶ Ŋkɔdɔhɔ Jehovah, nte, Afo edi Abasi: O Jehovah, kpaŋ utɔŋ nɔ uyo mkpe-ubɔk mi.

⁷ O Jehovah Ɔbɔŋ, odudu erinyaŋa mi, afo omofuk mi ibuot ke usen ekɔŋ.

⁸ O Jehovah, kunɔ se idɔŋde idiɔk owo: kuyak uduak esie ɔwɔrɔ usuŋ; mmɔ eyetaŋ idem. [Selah.]

⁹ Ama edi ibuot mmɔ eke ekande mi ekuk, ibak mkpɔk-inua mmɔ eyefuk mmɔ.

¹⁰ Eyetop ifia ikaŋ eduɔk mmɔ ke idem: enye eyemen mmɔ ɔduɔŋɔ ke ikaŋ, ye ke udem: mmɔ ididahake ke enyɔŋ.

¹¹ Owo inua idisɔŋɔke ida ke isɔŋ: owo afai eyekut idiɔk; eyebine enye osobo.

¹² Mmɔfiɔk nte ke Jehovah ekpe ikɔ eyen ukut, onyuŋ anam se inende ye eyen ubuene.

¹³ Kpasuk nti owo eyekɔm enyiŋ fo: ndien owo eyetie fi ke iso.