ŊWED MME PSALM 137 - Edisana ñwed Abasi Ibom

Eseme Nditɔ Israel ke Itie Ukut

¹ KE mben akpa mmɔŋ Babylon, do ke nnyin ikɔsuhɔre itie, inyuŋ itua eyet, ke ini nnyin itide Zion.

² Nnyin ikɔkɔŋ mme harp nnyin ke mme willow ke ufɔt esie.

³ Koro do ke mme anditaŋ nnyin nnyɔŋ ekebup nnyin ikɔ ikwɔ; mme andibume nnyin enyuŋ ebup idara, ete, “Mbufo ekwɔ usuk ikwɔ Zion enɔ nnyin.”

⁴ Nnyin idinam didie ikwɔ ikwɔ Jehovah ke esen idut?

⁵ Mma mfre fi, O Jerusalem, yak nnasia mi efre.

⁶ Yak edeme mi eyire mi ke nsiŋ, ke mme nsuk ntihi fi; ke mmensuk mmenekede Jerusalem ke enyɔŋ ŋkan ata idaresit mi.

⁷ O Jehovah, ti usen Jerusalem nɔ nditɔ Edom, emi ekedɔhɔde, ete, “Mbufo enam iferi, enam iferi, tutu esim isɔŋ esie.”

⁸ O adiaha Babylon, emi edisobode; ɔfɔfɔn ɔnɔ enye emi edidade erinam emi afo akanamde nnyin, osio usiene ye afo.

⁹ Ɔfɔfɔn ɔnɔ owo eke edimumde nditɔ-ɔwɔŋ fo oyibi ke itiat.