ŊWED MME PSALM 135 - Edisana ñwed Abasi Ibom

Etoro Abasi ke Mfɔn ye Odudu Esie

¹ MBUFO etoro Jehovah. Mbufo etoro enyiŋ Jehovah; mbufo ikɔt Jehovah etoro enye;

² emi edade ke ufɔk Jehovah, ke okure ufɔk Abasi nnyin.

³ Mbufo etoro Jehovah; koro Jehovah ɔfɔnde: ekwɔ enɔ enyiŋ esie: koro eyede.

⁴ Koro Jehovah emekde Jacob onim ke idem esie, emek Israel onim ke ata inyene esiemɔ.

⁵ Koro ami mmɔfiɔk nte ke Jehovah omokpon, Ɔbɔŋ nnyin omonyuŋ okpon akan kpukpru abasi.

⁶ Jehovah akanam kpukpru se enye amade ke enyɔŋ, ye ke isɔŋ, ye ke mmɔŋ, ye ke kpukpru mme udem.

⁷ Enye anam ntuhube adaha ke mme utit ererimbot ɔdɔk; anam obuma ɔnɔ edim; osio ofum ke ŋkpɔ-uto esie ada edi.

⁸ Emi okowotde mme akpan Egypt, ɔtɔŋɔde ye owo tutu osim ufene.

⁹ Emi ɔkɔnɔde mme idiɔŋɔ ye mme utibe ŋkpɔ esɔk ke otu mbufo, O Egypt, kpa ke idem Pharaoh ye ofuri ikɔt esie.

¹⁰ Emi akasuande ikpɔ mme idut, onyuŋ owotde mkpɔsɔŋ ndidem;

¹¹ Sihon edidem mme Amorite, ye Og edidem Basham, ye kpukpru ndidem Canaan:

¹² onyuŋ ada isɔŋ mmɔ ɔnɔ ke udeme, ete Israel ikɔt imɔ eda enyene.

¹³ O Jehovah, enyiŋ fo ebigi ke nsinsi; O Jehovah, se adade eti fi ododu ke ofuri emana.

¹⁴ Koro Jehovah eyekpe ikpe ikɔt esie, onyuŋ akabare ido esie abaŋa ikɔt esie.

¹⁵ Mme ibɔk mme idut edi silver ye gold, kpa ŋkpɔ eke ubɔk owo enamde.

¹⁶ Mmɔ enyene inua, edi idɔhɔke ikɔ; emenyene enyin, edi ikwe ŋkpɔ;

¹⁷ emenyene utɔŋ, edi ikopke; baba ibifik inyuŋ iduhe mmɔ ke inua.

¹⁸ Mme andinam ŋkpɔ mmɔ eyebiet mmɔ: kpa ntre kpukpru owo eke ebuɔtde idem-mmɔ ye mmɔ.

¹⁹ Mbufo, ufɔk Israel, ekɔm Jehovah: ufɔk Aaron, mbufo ekɔm Jehovah.

²⁰ Ufɔk Levi, ekɔm Jehovah: mme andibak Jehovah, mbufo ekɔm Jehovah.

²¹ Yak etie ke Zion ekɔm Jehovah emi oduŋde ke Jerusalem. Mbufo etoro Jehovah.