ŊWED MME PSALM 132 - Edisana ñwed Abasi Ibom

Ndibeŋe Edidiɔŋ Abasi Nnɔ Ebiet Ntuahibuot

Ikwɔ mmɔ eke edɔkde.

¹ O JEHOVAH, ti ofuri ukut David nɔ enye:

² emi ɔkɔŋwɔŋɔde ɔnɔ Jehovah, okonyuŋ akaŋade ɔnɔ ɔkpɔsɔŋ Abasi Jacob; (ete)

³ Ndidukke ke tent iduŋ mi, ndinyuŋ ndɔkke ke bed emi mbride;

⁴ ndinɔŋɔ enyin mi idap, ndinyuŋ nnɔŋɔ mkpɔk-enyin mi eyet-idap,

⁵ tutu ŋkut ebiet nnɔ Jehovah, ye iduŋ nnɔ Ɔkpɔsɔŋ Abasi Jacob.

⁶ Sese, nnyin ikokop ke Ephrathah ibaŋa enye: ikokut enye ke obot inwaŋ.

⁷ Yak nnyin ika ke iduŋ esie: yak nnyin ituak ibuot ke ɔtɔ udorukot esie.

⁸ O Jehovah, daha ke enyɔŋ koduk ebiet nduɔk-odudu fo, afo ye ekebe odudu fo.

⁹ Yak mme oku fo esine edinen ido ke idem; yak mbon ima fo enyuŋ esio mkpo idara.

¹⁰ Kukabare iso Messiah fo ufep, ke abaŋa David owo fo.

¹¹ Jehovah ɔmɔŋwɔŋɔ ɔnɔ David ke akpanikɔ; enye idiwɔŋɔkede ikpɔŋ enye; “Nyeda mfri idem fo ndori ke ebekpo fo.

¹² Nditɔ fo ema enim ediomi mi, ye ikɔ-ntiense mi emi ndikpepde mmɔ, nditɔ mmɔ ŋko eyetie ke ebekpo fo ke nsinsi-nsinsi.”

¹³ Koro Jehovah emekde Zion; onyuŋ oyom enye ke iduŋ ke idem esie.

¹⁴ “Emi edi nduɔk-odudu mi ke nsinsi; mi ke ndiduŋ; koro nyoyom enye.

¹⁵ Nditreke ndidiɔŋ udia esie: nyenɔ nditɔ ubuene esie uyo eyuhɔ.

¹⁶ Ndien nyeda erinyaŋa nsine mme oku esie ke idem: ndien mbon ima esie eyesio mkpo idara.

¹⁷ Do ke ndinam nduk otibe ɔnɔ David: mmɔdiɔŋ utuenikaŋ nnɔ Messiah fo.

¹⁸ Nyeda but nsine mme asua esie ke idem: edi anyanya emi enye ayarade eyesiaha.”