ŊWED MME PSALM 119 - Edisana ñwed Abasi Ibom

Mme Ibet Abasi

¹ ƆFƆFƆN ɔnɔ mmɔ eke usuŋ mmɔ ɔfɔnde ama, eke esaŋade ke ŋwed ido Jehovah.

² Ɔfɔfɔn ɔnɔ mmɔ eke enimde uyo esie, eke eyomde enye ke ofuri esit.

³ Eke minyuŋ inamke ukwaŋ-ŋkpɔ: edi esaŋa ke usuŋ esie.

⁴ Afo omowuk ete etim enim item fo eti-eti.

⁵ Oh usuŋ mi akpakam enyene iwuk, man ŋkpeme mme ewuhɔ fo.

⁶ Ndien but idinamke mi, ke ini ami ntiŋde enyin ke kpukpru mbet fo.

⁷ Nyeda esit kiet ŋkɔm fi, ke ami ŋkpepde edinen ikpe fo.

⁸ Nyenim mme ewuhɔ fo: Oh, kukpɔŋ mi fap-fap.

⁹ Eyenɔwɔŋ ada nso anam usuŋ esiemɔ asana, onyuŋ ekpeme enye nte ikɔ fo asaŋade?

¹⁰ Mmada ofuri esit mi nyom fi: kuyak mi ŋkpɔŋ mbet fo ndue.

¹¹ Mmada ikɔ fo ndip ke esit mi, man ŋkudue fi.

¹² Yak ekɔm fi, O Jehovah: kpep mi ewuhɔ fo.

¹³ Mmada mkpɔk-inua mi mbuk kpukpru ikpe inua fo.

¹⁴ Mmenem esit ke usuŋ uyo fo ŋkan ofuri inyene.

¹⁵ Edi item fo ke ndikere, nyenyuŋ ntiŋ enyin ke mme usuŋ fo.

¹⁶ Mme ewuhɔ fo eyedat mi esit: ndifreke ikɔ fo.

¹⁷ Fɔn ido ye owo fo, nyedu uwem, ndien nyenim ikɔ fo.

¹⁸ Fuhɔre mi enyin, ndien nyekut mme utibe-ŋkpɔ ke ŋwed ido fo.

¹⁹ Ami ndi esen owo ke isɔŋ; kudip mi mbet fo.

²⁰ Ukpɔŋ mi amanuaha, koro mme ikpe fo edɔŋde mi kpukpru ini.

²¹ Afo amasua ɔnɔ mbon iseri, emi ɔdiɔkde ye mmɔ, emi ekpɔŋde mbet fo edue.

²² Bɔ mi esuene ye but ke idem fep, koro mmekpeme uyo fo.

²³ Mbɔŋ ŋko eketie etiŋ ikɔ edian mi: owo fo ekere mme ewuhɔ fo.

²⁴ Uyo fo ŋko edi inemesit mi ye mbon item mi.

²⁵ Ukpɔŋ mi adiana ke ntan; nim mi uwem, nte ikɔ fo asaŋade.

²⁶ Mmobuk usuŋ mi: afo omonyuŋ eyere mi: kpep mi mme ewuhɔ fo.

²⁷ Tim sian mi usuŋ item fo: ndien nyekere mme utibe ŋkpɔ.

²⁸ Ukpɔŋ mi atua eyet ke mfuhɔ: menere mi nim ke enyɔŋ, nte ikɔ fo asaŋade.

²⁹ Sio mi usuŋ nsu ke idem fep: nyuŋ da ido fo fɔn mi.

³⁰ Mmemek usuŋ akpanikɔ: mmonim mme ikpe fo ke iso mi.

³¹ Mmeyire ye uyo fo: O Jehovah, kuyak but anam mi.

³² Nyefehe ke usuŋ mbet fo, koro afo eyeŋwaŋa mi esit.

³³ O Jehovah, wut mi usuŋ mme ewuhɔ fo: ndien nyekpeme enye tutu nsim akpatre.

³⁴ Tim sian mi, ndien nyekpeme ido fo; nnyuŋ nnim enye ke ofuri esit mi.

³⁵ Nam mi nsaŋa ke usuŋ mbet fo, koro mmama enye.

³⁶ Nam esit mi ebine uyo fo; kuyak ebine udori.

³⁷ Kabare mi enyin fep ŋkukut nsu-usn ŋkpɔ; da usuŋ fo nim mi uwem.

³⁸ Nam uyo fo emi enyenede mmɔ eke ebakde fi, ɔsɔŋɔ ada ɔnɔ owo fo.

³⁹ Sio mi esuene emi mfehede, ke idem fep: koro mme ikpe fo efɔnde.

⁴⁰ Sese, mmoyom item fo: da eti ido fo nim mi uwem.

⁴¹ O Jehovah, yak ima fo ebine mi, kpa erinyaŋa fo, nte ikɔ fo asaŋade.

⁴² Ndien nyeda ikɔ mbɔrɔ andisuene mi: koro mbuɔtde idem ke ikɔ fo.

⁴³ Kunyuŋ ubɔ mi ofuri akpanikɔ ke inua ufep; koro mmodori enyin mi ke mme ikpe fo.

⁴⁴ Ndien nyenim ido fo kpukpru ini ke nsinsi-nsinsi.

⁴⁵ Ndien nyesaŋa ke ŋŋwaŋa ebiet: koro nyomde item fo.

⁴⁶ Nyenyuŋ ntiŋ mbaŋa uyo fo ke iso ndidem, but idinyuŋ inamke mi.

⁴⁷ Mbet fo emi mmade eyenyuŋ enem mi esit.

⁴⁸ Nnyenyuŋ mmenere ubɔk mi nnɔ mbet fo emi mmade; nnyuŋ ntie ŋkere mme ewuhɔ fo.

⁴⁹ Ti ikɔ nɔ owo fo: koro afo anamde mi ndori enyin (ye afo).

⁵⁰ Emi edi ndɔŋesit mi ke nnanenyin mi: koro ikɔ fo onimde mi uwem.

⁵¹ Mbon iseri esuene mi eti eti: edi ŋwɔŋɔkede ŋkpɔŋ ido fo.

⁵² Mmeti mme ikpe fo eke eset, O Jehovah; nnyuŋ ŋkop ndɔŋ-esit.

⁵³ Ifuresit omum mi abaŋa mme idiɔk owo eke ekpɔŋde ido fo.

⁵⁴ Mme ewuhɔ fo edi ikwɔ mi ke ufɔk eke ndaŋde.

⁵⁵ Mmeti enyiŋ fo ke okoneyo, O Jehovah, nnyuŋ ŋkpeme ido fo.

⁵⁶ Emi ke ŋkut: koro nnimde item fo.

⁵⁷ O Jehovah, udeme mi, ndɔhɔ nte ke ndinim ikɔ fo.

⁵⁸ Mmekpe fi ubɔk ke ofuri esit mi: fɔn ido ye ami nte afo ɔdɔhɔde.

⁵⁹ Ŋkekere usuŋ fo, nnyuŋ ŋkabare ukot mi nsin ke uyo fo.

⁶⁰ Nsɔp ubɔk, nnamke mbigi, ke erinim mbet fo.

⁶¹ Mme udim mme oburobut owo ekan mi ekuk: edi mfreke mme ido fo.

⁶² Ke ufɔt okoneyo ke ndidaha ke enyɔŋ ntoro fi, mbaŋa ndine ikpe fo.

⁶³ Ami ndi nsaŋa kpukpru mmɔ eke ebakde fi, ye eke mmɔ emi enimde item fo.

⁶⁴ Ima fo, O Jehovah, ɔyɔhɔ ke ererimbot: kpep mi mme ewuhɔ fo.

⁶⁵ O Jehovah, afo amanam eti ŋkpɔ ye owo fo, nte afo ɔkɔdɔhɔde.

⁶⁶ Kpep mi mfɔn ibuot ye ifiɔk: koro mmonim mbet fo ke akpanikɔ.

⁶⁷ Ke mmeŋka-ŋkwe ukut ami ndedue: edi ke emi ke nnim ikɔ fo.

⁶⁸ Afo ɔmɔfɔn, onyuŋ ɔfɔn ido; kpep mi mme ewuhɔ fo.

⁶⁹ Mbon iseri edɔk nsu edori mi: edi mmonim item fo ke ofuri esit mi.

⁷⁰ Esit mmɔ etie nte ikpɔŋ unam: ido fo enem mi esit.

⁷¹ Ɔfɔn ye ami koro ŋkokutde ukut; man ŋkpep mbet fo.

⁷² Ido inua fo ɔfɔn mi akan mme tɔsin gold ye silver.

⁷³ Ubɔk fo amanam mi, omonyuŋ obot mi: tim sian mi, nyuŋ yak mi ŋkpep mbet fo.

⁷⁴ Mmɔ eke ebakde fi eyekut mi, enyuŋ edat esit, koro ndoride enyin ke ikɔ fo.

⁷⁵ O Jehovah, mmɔfiɔk nte mme ikpe fo enende: akpanikɔ omonyuŋ esin fi otuk mi.

⁷⁶ Mbɔk, yak ima fo edi se idɔŋde mi esit, kpa nte afo ɔkɔdɔhɔde ikɔ ye owo fo.

⁷⁷ Yak mbɔm fo etiene mi, man ndu uwem: koro mme ido fo enemde mi esit.

⁷⁸ Yak but anam mbon iseri: koro mmɔ edade nsu eyut mi: ami ntie ŋkere item fo.

⁷⁹ Yak mmɔ eke ebakde fi, enyuŋ efiɔkde uyo fo, efiak etiene mi.

⁸⁰ Nam esit mi ɔfɔn ama ke mme ewuhɔ fo; man but okunam mi.

⁸¹ Ukpɔŋ akpa mi ke eriyom erinyaŋa fo: ndori enyin ke mme ikɔ fo.

⁸² Enyin akpa mi ke eriyom ikɔ fo, ete, ini ewe ke afo edidɔŋ mi esit?

⁸³ Koro mmebiet ekpat mmɔŋ ke nsuŋikaŋ; mfreke mme ewuhɔ fo.

⁸⁴ Mme usen owo fo etie didie? Ke ini ewe ke afo edikpe ikpe ye mmɔ eke ekɔbɔde mi?

⁸⁵ Mbon iseri etibi obube enɔ mi, emi mikemke ye ido fo.

⁸⁶ Kpukpru mbet fo edi akpanikɔ: mmɔ eda nsu ekɔbɔ mi: nyaŋa mi.

⁸⁷ Osuk esisit mmɔ ekpesobo mi ke isɔŋ: edi ami ŋkpɔŋke item fo.

⁸⁸ Nim mi ke uwem nte ima fo asaŋade; ndien nyenim uyo inua fo.

⁸⁹ O Jehovah ikɔ fo ɔmɔwuhɔ ke

⁹⁰ enyɔŋ ke nsinsi. Akpanikɔ fo ebigi ke ofuri emana: afo omowuk isɔŋ, ndien enye ɔsɔŋɔ ada.

⁹¹ Mmɔ eda enɔ mme ikpe fo mfin:

⁹² koro kpukpru edide ifin fo. Ke mikpedige ido fo edi inemesit mi, ŋkposobo ke ukut mi ke ini oro.

⁹³ Ndifreke item fo ke nsinsi: koro afo adade mmɔ onim mi ke uwem.

⁹⁴ Ami ndi okuomɔ, nyaŋa mi: koro mmoyom item fo.

⁹⁵ Mme idiɔk owo emebet mi, ete isobo mi: nyetim mfiɔk uyo fo.

⁹⁶ Mmokut utit kpukpru mfɔn-mma: edi ibet fo enyene ubom eti-eti.

⁹⁷ Mmama ido fo didie! enye ke ntie ŋkere ofuri usen.

⁹⁸ Ibet fo enam mi mfiɔk ŋkpɔ ŋkan mme asua mi: koro enye edide okim ke nsinsi.

⁹⁹ Ndi ɔniɔŋ ŋkan kpukpru mmɔ emi etemede mi; koro uyo fo edide se ntiede ŋkere.

¹⁰⁰ Ndi asian ŋkan mbiowo, koro nnimde item fo.

¹⁰¹ Mmakpan ukot mi ke kpukpru mme idiɔk usuŋ, man ŋkpeme item fo.

¹⁰² Ŋwɔŋɔkede ŋkpɔŋ mme ikpe fo: koro edi afo eteme mi.

¹⁰³ Ikɔ fo eniŋe mi didie ke nsiŋ! akan aran-ɔkwɔk ke inua mi:

¹⁰⁴ nda item fo ŋwɔrɔ asian: oro esin nsua kpukpru usuŋ nsu.

¹⁰⁵ Ikɔ fo edi utuenikaŋ ukot mi, ye uŋwana usuŋ mi.

¹⁰⁶ Mmɔŋwɔŋɔ, nyenyuŋ nnim enye, nte ke ndikpeme ndinen ikpe fo.

¹⁰⁷ Mmokut ukut eti-eti: O Jehovah, demere mi nte ekemde ke ikɔ fo.

¹⁰⁸ Mbɔk, yak mme uwa ima inua mi enem fi, O Jehovah, nyuŋ kpep mi mme ikpe fo.

¹⁰⁹ Ukpɔŋ mi odu mi ke ubɔk kpukpru ini: edi mfreke ido fo.

¹¹⁰ Mme ɔburɔbut owo emekɔk afia enɔ mi: edi ŋwahake ŋkpɔŋ item fo.

¹¹¹ Mmada uyo fo nnyene ke nsinsi: koro mmɔ edide idaresit mi.

¹¹² Mmonuk esit mi ndinim mme ewuhɔ fo ke nsinsi, tutu osim akpatre.

¹¹³ Nsasua mbon esit iba: edi mmama ido fo.

¹¹⁴ Afo edi ebiet-udibe mi ye otu-ekɔŋ mi: mmebet uyo fo.

¹¹⁵ Mbufo, mme anam idiɔk, ewɔŋɔre ekpɔŋ mi: ndien nyenim mbet Abasi mi.

¹¹⁶ Mum mi kama, nte ekemde ye ikɔ fo, ndien nyedu uwem: kunyuŋ uyak but anam mi ke idorienyin mi.

¹¹⁷ Mum mi kama, ndien eyenyaŋa mi: nyenyuŋ ntiŋ enyin ke mme ewuhɔ fo kpukpru ini.

¹¹⁸ Afo ada kpukpru mmɔ eke ekpɔŋde mme ewuhɔ fo edue, ese ke mbio: koro abiaŋa mmɔ edide nsu.

¹¹⁹ Afo omosobo kpukpru mme idiɔk owo ererimbot nte mbukpeŋ; oro esin ami mma uyo fo.

¹²⁰ Ndik fo anam mi ndidien ke idem; ndien mfefehe mme ikpe fo.

¹²¹ Ŋkpe edinen ikpe: kuyak mi unɔ mmɔ eke etukde mi.

¹²² Nim ubiɔŋ ke owo fo, man ɔfɔn enye: kuyak mbon iseri etuk mi.

¹²³ Enyin ekim mi ke eriyo erinyaŋa fo, ye ikɔ edinen ido fo.

¹²⁴ Nam ye owo fo nte ekemde ke ima fo, nyuŋ kpep mi mme ewuhɔ fo.

¹²⁵ Ami ndi owo fo: tim sian mi, nyuŋ yak mfiɔk uyo fo.

¹²⁶ Ekem ke ini Jehovah akpanamde ŋkpɔ: mmɔ ebiat ido fo.

¹²⁷ Oro esin mmama mbet fo ŋkan gold; idem ata eti gold.

¹²⁸ Mmɔdo mmese kpukpru item fo emi ebaŋade kpukpru ŋkpɔ ke se inende; nnyuŋ nsua kpukpru usuŋ nsu.

¹²⁹ Ikɔ ntiense fo edi utibe: oro esin ukpɔŋ mi ekpeme mmɔ.

¹³⁰ Erisiak ikɔ fo aŋwaŋa owo: otim asian mme ɔkɔi.

¹³¹ Ŋwaŋade inua mi, nyuŋ ŋwek; koro mbet fo edɔŋde mi.

¹³² Kabare se mi, nyuŋ fɔn ido ye ami, kpa nte afo akam anamde ye mmɔ eke emade enyiŋ fo.

¹³³ Da ikɔ fo nam ikpat mi ɔsɔŋ ada: kunyuŋ uyak baba idiɔk ido kiet akan mi.

¹³⁴ Fak mi sio ke utuk owo: ndien nyenim item fo. Nam iso fo ayama ɔnɔ owo fo; nyuŋ kpep mi mme ewuhɔ fo.

¹³⁵ Akpa mmɔŋ eto mi ke enyin esuhɔre:

¹³⁶ koro mmɔ minimke ido fo.

¹³⁷ O Jehovah, afo anam edinen, mme ikpe fo enyuŋ enen.

¹³⁸ Afo omowuk se inende, kpa ikɔ ntiense fo, ye akpanikɔ eti-eti.

¹³⁹ Ufup mi ata mi: koro mme asua mi efrede ikɔ fo.

¹⁴⁰ Ikɔ fo amasana eti-eti: owo fo omonyuŋ ama enye. Ami mmekpri, nnyuŋ ntie nte mbio: edi mfreke item fo.

¹⁴¹ Eti ido fo enen ke nsinsi: mme ido fo enyuŋ edi akpanikɔ.

¹⁴² Ukut ye nnanenyin emesim mi:

¹⁴³ mbet fo edi ŋkpɔ inemesit mi.

¹⁴⁴ Ikɔ ntiense fo edi edinen ke nsinsi: tim sian mi, ndien itɔŋ uwem eyesɔŋ mi.

¹⁴⁵ Nda ofuri esit nseme; yere mi, O Jehovah; nyenim mme ewuhɔ fo.

¹⁴⁶ Nseme ŋkot fi; nyaŋa mi, ndien nyenim uyo fo.

¹⁴⁷ Ndi ke iso fo ke usenubɔk, ndiseme: ntie mbet ikɔ fo.

¹⁴⁸ Enyin mi ebem mme efen iso: man ntie ŋkere ikɔ fo.

¹⁴⁹ Kop uyo mi nte ekemde ye ima fo: O Jehovah, nim mi uwem nte ekemde ye mme ikpe fo.

¹⁵⁰ Mmɔ eke ebinede ibak emekpere: mmɔ emekpɔŋ ido fo anyan ebiet.

¹⁵¹ O Jehovah, afo emekpere; kpukpru mbet fo enyuŋ edi akpanikɔ.

¹⁵² Anyan ini oko ŋkada ikɔ ntiense fo mfiɔk, nte ke afo anam mmɔ etie ke nsinsi.

¹⁵³ Se ukut mi, nyuŋ babare mi; koro mmemfreke mbet fo.

¹⁵⁴ Kpe ikpe mi, nyuŋ fak mi; nim mi uwem nte ekemde ye ikɔ fo.

¹⁵⁵ Ifure ɔmɔkpɔŋ mme oburobut owo anyan usuŋ: koro mmɔ miyomke mme ewuhɔ fo.

¹⁵⁶ O Jehovah, mbɔm fo amawak: nim mi uwem nte mme ikpe fo esaŋade.

¹⁵⁷ Mmɔ eke ebinede mi enyuŋ ekɔbɔde mi ewak; ŋwɔŋɔkede ŋkpɔŋ ikɔ ntiense fo.

¹⁵⁸ Ŋkut mbon abiaŋa, ndien efek mi: mmɔ eke minimke ikɔ fo.

¹⁵⁹ Sese, nte mmada item fo, O Jehovah: nim mi uwem nte ekemde ye ima fo.

¹⁶⁰ Ofuri ikɔ fo edi akpanikɔ: kpukpru ndinen ikpe fo enyuŋ edu ke nsinsi.

¹⁶¹ Mbɔŋ ekɔbɔ mi ke minyeneke ntak: ndien ikɔ fi esin esit mi edikhe.

¹⁶² Ikɔ fo enem mi esit, kpa nte owo eke ɔfiɔhɔde ediwak mbume.

¹⁶³ Nsasua nsu, nnyuŋ nse ke ŋkpɔ mbubiam: mmama ido fo.

¹⁶⁴ Ntoro fi utim ikatiaba ke usen, mbaŋa edinen ikpe fo.

¹⁶⁵ Mmɔ eke emade ido fo enyene ediwak ifure: mmɔ inyuŋ ikwe ŋkpɔ iduɔ baba kiet.

¹⁶⁶ O Jehovah, ndorienyin ke erinyaŋa fo, nnyuŋ nnam mbet fo.

¹⁶⁷ Ukpɔŋ mi ekpeme ikɔ ntiense fo; nnyuŋ mma mmɔ eti-eti.

¹⁶⁸ Mmekpeme item fo ye ikɔ ntiense fo: koro kpukpru usuŋ mi enade fi ke iso.

¹⁶⁹ Yak eseme mi edi ekpere fi ke iso, O Jehovah: tim sian mi nte ikɔ fo asaŋade.

¹⁷⁰ Yak mkpe-ubɔk mi edi fi ke iso: nyaŋa mi nte ekemde ye uyo fo.

¹⁷¹ Mkpɔk-inua mi eyeŋwaŋa itoro; koro afo edikpepde mi mme ewuhɔ fo.

¹⁷² Yak edeme mi ɔbɔrɔ se afo ɔdɔhɔde: koro kpukpru mbet fo enende.

¹⁷³ Yak ubɔk fo edi ediŋwam mi; koro mmemek mme item fo.

¹⁷⁴ O Jehovah, erinyaŋa fo ke ɔdɔŋ mi; mbet fo enyuŋ enem mi esit.

¹⁷⁵ Yak ukpɔŋ mi odu uwem, onyuŋ otoro fi; yak mme ikpe fo enyuŋ eŋwam mi.

¹⁷⁶ Nsaŋa ndiyo nte erɔŋ eke osopde; yom owo fo; koro mmemfreke mbet fo.