ŊWED MME PSALM 118 - Edisana ñwed Abasi Ibom

Ikwɔ Edikan

¹ O MBUFO ekɔm Jehovah; koro enye ɔfɔnde: koro ima esie odude ke nsinsi.

² Yak Israel akam ɔdɔhɔ, ete, “Koro ima esie odude ke nsinsi.”

³ Yak ufɔk Aaron akam ɔdɔhɔ, ete, “Koro ima esie odude ke nsinsi.”

⁴ Yak mme andibak Jehovah ekam edɔhɔ, ete, “Koro ima esie odude ke nsinsi.”

⁵ Ntie ke itie ukut nseme ŋkot Jehovah: Jehovah eyere mi ke akwa ufaŋ.

⁶ Jehovah edi okimmɔ; ndidigeke: owo ekeme ndinam mi nso ŋkpɔ?

⁷ Jehovah ada ye ami ke otu mmɔ eke eŋwamde mi: ndien ami nyekut mmɔ eke esuade mi.

⁸ Ɔfɔn ndibuɔt Jehovah, ŋkan ndibuɔt owo.

⁹ Ɔfɔn ndibuɔt Jehovah ŋkan ndibuɔt mbɔŋ.

¹⁰ Kpukpru mme idut ekan mi ekuk: nditreke ndida enyiŋ Jehovah mkpeŋe mmɔ.

¹¹ Mmɔ ekan mi ekuk; ŋkɔm, mmɔ ekan mi ekuk: nditreke ndida enyiŋ Jehovah ŋkpeŋe mmɔ.

¹² Mmɔ ekan mi ekuk nte ɔkwɔk; enime nte ikaŋ ke ikɔt: nditreke ndida enyiŋ Jehovah ŋkpeŋe mmɔ.

¹³ Afo okonuk mi ɔkpɔsɔŋ ete nduɔ: ndien Jehovah aŋwam mi.

¹⁴ Jehovah edi odudu mi ye ikwɔ, enye omonyuŋ akabare edi erinyaŋa mi.

¹⁵ Uyo idara ye erinyaŋa odu ke mme tent edinen owo: ubɔk nnasia Jehovah anam uko.

¹⁶ Ubɔk nnasia Jehovah omokoŋ: ubɔk nnasia Jehovah anam uko.

¹⁷ Ndikpaha mkpa, edi nyedu uwem, nnyuŋ mbuk se Jehovah anamde.

¹⁸ Jehovah otim ɔtunɔ mi: edi iyakke mi inɔ mkpa.

¹⁹ Mbufo eberere inua-otop eti ido: nyebe mmɔ nduk, nyekɔm Jehovah;

²⁰ emi edi inua-otop Jehovah, ndinen owo eyeduk ke esit.

²¹ Nyekɔm fi, koro afo eyerede mi: ama onyuŋ akabare edi erinyaŋa mi.

²² Itiat emi mme andibɔp esinde amakabare edi etubom inuk.

²³ Emi oto Jehovah; nnyin inyuŋ ise enye ke utibe.

²⁴ Usen emi ke Jehovah akanam; nnyin iyedara, inyuŋ ibre ke esit.

²⁵ Mbɔk, O Jehovah, mbɔk, nyaŋa: mbɔk, O Jehovah, mbɔk, nam nnyin ikut unen.

²⁶ Ekɔm enye emi edide ke enyiŋ Jehovah: nnyin itie ke ufɔk Jehovah ikɔm fi.

²⁷ Jehovah edi Abasi, enye omonyuŋ aŋwaŋa nnyin. Mbufo eda uruk etebe uwa tutu esim ke nduk itie-uwa.

²⁸ Afo edi Abasi mi, ndien nyekɔm fi: Abasi mi, nyekpono fi.

²⁹ Mbufo ekɔm Jehovah, koro enye ɔfɔnde: koro ima esie ebigide ke nsinsi.