ŊWED MME PSALM 115 - Edisana ñwed Abasi Ibom

Akwa Abasi Kierakiet ye Mme Abasi Ubɔk Owo

¹ KUNƆ nnyin, O Jehovah, kunɔ nnyin, edi nɔ enyiŋ fo ubɔŋ, baŋa ima fo ye akpanikɔ fo.

² Mme idut ekpedɔhɔ didie, ete, Enye Abasi mmɔ, ndien?

³ Ŋkɔm Abasi nnyin ododu ke heaven: anam kpukpru se enye amade.

⁴ Mme abasi mmɔ edi silver ye gold, kpa ŋkpɔ eke ubɔk owo anamde.

⁵ Mmɔ enyene inua, edi idɔhɔke ikɔ: emenyene enyin, edi ikwe ŋkpɔ:

⁶ emenyene utɔŋ, edi ikopke: emenyene ibuo, edi iŋwuneke:

⁷ se ubɔk mmɔ, edi itukke ŋkpɔ: se ukot mmɔ, edi isaŋake: mmɔ inyuŋ isioroke uyo ke itɔŋ mmɔ.

⁸ Mmɔ eke enamde mmɔ eyebiet mmɔ, kpa kpukpru owo eke ebuɔtde idem ke esit.

⁹ O Israel, mbufo ebuɔt idem ye Jehovah; enye edi andinyaŋa mmɔ ye otu-ekɔŋ mmɔ.

¹⁰ O Ufɔk Aaron, mbufo ebuɔt idem ye Jehovah: enye edi andinyaŋa mmɔ ye otu-ekɔŋ mmɔ.

¹¹ Mbufo emi ebakde Jehovah, ebuɔt idem ye Jehovah: enye edi andinyaŋa mmɔ ye otu-ekɔŋ mmɔ.

¹² Jehovah emeti nnyin: enye eyediɔŋeyediɔŋ ufɔk Israel; eyediɔŋ ufɔk Aaron.

¹³ Eyediɔŋ mmɔ eke ebakde Jehovah, ye ŋkpri ye ikpɔ.

¹⁴ Yak Jehovah anam mbufo etɔt, kpa mbufo ye nditɔ mbufo.

¹⁵ Jehovah andinam enyɔŋ ye isɔŋ akam ɔdiɔŋ mbufo.

¹⁶ Enyɔŋ edi heaven Jehovah: edi enye ada isɔŋ ɔnɔ nditɔ owo.

¹⁷ Idige mme akpa-mkpa editoro Jehovah, inyuŋ idige owo mmɔ baba kiet emi esuhɔrede ke ndobo.

¹⁸ Ndien nnyin iyetoro Jehovah ke emi ye ke nsinsi. Mbufo etoro Jehovah.