ŊWED MME PSALM 112 - Edisana ñwed Abasi Ibom

Abasi Ɔdɔdiɔŋ Mme Mmɔ Emi Ebakde Enye

¹ MBUFO etoro Jehovah. Ɔfɔfɔn ɔnɔ owo eke abakde Jehovah, adara mbet esie eti-eti.

² Ubon esie eyenam uko ke ererimbot: ɔfɔfɔn ɔnɔ emana mbon eti ido.

³ Ubɔŋ ye inyene edu enye ke ufɔk: edinen ido esie onyuŋ ebigi ke nsinsi.

⁴ Uŋwana asiaha ke ekim ɔnɔ nti owo: enye ɔfɔn ido, onyuŋ enyene esit mbɔm, onyuŋ enen.

⁵ Ɔfɔfɔn ye owo eke ɔfɔnde ido, onyuŋ ɔnɔde ebuɔt: enye eyekama ŋkpɔ esie nte enende.

⁶ Koro enye midisehekede ke nsinsi: owo edinen ido eyedi se editide ke nsinsi.

⁷ Idiɔk etop idinamke enye ndik: esit esie ɔmɔwuhɔ, ɔbuɔt idem ye Jehovah.

⁸ Esit esie ɔmɔsɔŋ ada, ndik idinamke enye, tutu enye okut mme asua esie.

⁹ Enye amatat ubɔk, ɔnɔ mme ubuene ŋkpɔ; edinen ido esie ebigi ke nsinsi; ubɔŋ emenere nduk esie ke enyɔŋ.

¹⁰ Idiɔk owo eyekut, onyuŋ ayat esit; eyeta edet esie, onyuŋ atara: udɔŋ idiɔk owo eyetak.