ŊWED MME PSALM 104 - Edisana ñwed Abasi Ibom

Ekɔm Abasi Andibot

¹ UKPƆŊ mi, kɔm Jehovah. O Jehovah Abasi mi, afo omokpon eti-eti; afo emesine ubom ye ubɔŋ ke idem.

² Ada uŋwana nte ɔfɔŋidem ofuk idem: onyuŋ anyanare ikpa-enyɔŋ nte ukara:

³ ɔkɔŋ ubet esie ke mmɔŋ: ada obubit enyɔŋ onim ke chariot esie: odoro ke mba ofum asaŋa:

⁴ anam mme angel esie edi spirit; anam mme asaŋ-utom esie edi edemikaŋ:

⁵ enye odori isɔŋ ke itie esie, idisehekede ke nsinsi-nsinsi.

⁶ Afo ada akwa mmɔŋ nte ɔfɔŋ-idem ofuk enye (isɔŋ): mmɔŋ ada okoŋ akan ikpɔ obot.

⁷ Nduari fo esin mmɔ efeŋe; uyo obuma fo esin mmɔ esɔp itɔk enyɔŋɔ.

⁸ Mmɔ edɔk ke ikpɔ obot; esuhɔre ke itihere, esim ebiet emi afo onimde ɔnɔ mmɔ.

⁹ Afo omonim adaŋa, mmɔ idikaŋake; idinyuŋ ikabakede idifuk isɔŋ.

¹⁰ Enye anam idim ewet ke itihere, mmɔ esaŋa ke otu ikpɔ obot.

¹¹ Mmɔ enɔ kpukpru mme unam ikɔt mmɔŋ eŋwɔŋ: mme ass wilderness esuk itɔŋ mmɔ.

¹² Mme inuen enyɔŋ eduŋ ke enyɔŋ mmɔ, etie ke otu ŋkɔk esioro uyo.

¹³ Enye osio mmɔŋ ke ubet esie ebit ikpɔ obot: mfri utom fo ɔyuhɔ isɔŋ.

¹⁴ Enye anam mbiet otibe ɔnɔ ufene, ye ikɔŋ emi owo anamde utom ke esit, man osio udia ke isɔŋ.

¹⁵ Wine onyuŋ enem owo esit, anam iso esie ayama akan aran, uyo onyuŋ anam esit ɔsɔŋɔ owo.

¹⁶ Mme eto Jehovah emeyuhɔ; kpa mme cedar Lebanon emi enye ɔtɔde;

¹⁷ emi ŋkpri inuen enamde efɔk mmɔ do; ama edi stork, mme cypress edi iduŋ esie,

¹⁸ Ikpɔ obot enyene ebot ikɔt; ikpɔ itiat edi ubɔhɔ mme cony.

¹⁹ Enye anam ɔfiɔŋ onim ɔnɔ ini eke odoride: utin ɔmɔfiɔk nte enye odukde ikɔt.

²⁰ Afo onim ekim, ndien okoneyo edi: kpukpru mme unam ikɔt esaŋa ndien.

²¹ Mkparawa lion ekuni ebine se ekpewaide, man ebeŋe Abasi udia mmɔ.

²² Utin asiaha, mmɔ esop idem, enyuŋ eka ekena ke nna mmɔ.

²³ Owo ɔwɔrɔ aka utom esie, ye se enye anamde tutu osim ke mbubreyo.

²⁴ O Jehovah, ŋkpɔ emi afo anamde ewak didie! Afo amanam mmɔ kpukpru ke ifiɔk; inyene fo ɔyɔhɔ ke ererimbot.

²⁵ Se akwa inyaŋ emi okponde ubom; mme andinyɔni emi minyeneke ibat edu do, ye ŋkpri ye ikpɔ unam.

²⁶ Mme ubom mbakara esaŋa ke esit: leviathan emi afo okobotde, ete ebre ke esit odu do.

²⁷ Kpukpru mmɔ edori fi enyin, ete ɔnɔ mmimɔ udia ke ekem ini.

²⁸ Afo ɔnɔ mmɔ; mmɔ etaŋ: afo atat ubɔk fo, mmɔ eyuhɔ nti ŋkpɔ.

²⁹ Afo odip iso fo, nsia oyomo mmɔ: ataŋ ibifik mmɔ, mmɔ enime, enyuŋ efiak ke ntan mmɔ.

³⁰ Afo ɔdɔŋ spirit fo ɔwɔrɔ, mmɔ eboro: afo onyuŋ ɔdiɔŋ iso isɔŋ.

³¹ Ubɔŋ fo eyedu ke nsinsi: Jehovah eyedat esit ke ŋkpɔ emi enye anamde.

³² Enye owuk enyin ese isɔŋ, ndien isɔŋ enyek: otuk ikpɔ obot, ndien mmɔ ewɔrɔ nsuŋ-ikaŋ.

³³ Nyekwɔ nnɔ Jehovah ke ofuri uwem mi: nyetoro Abasi mi adaŋa ini nte ndude.

³⁴ Ekikere mi eke abaŋade enye eyenem mi esit: ami nyedara Jehovah.

³⁵ Mme anam idiɔk emekure ke ererimbot; mme oburobut owo inyuŋ iduhe aba. Ukpɔŋ mi, kɔm Jehovah. Mbufo etoro Jehovah.