ŊWED MME PSALM 103 - Edisana ñwed Abasi Ibom

Ima Abasi

Eke David.

¹ O UKPƆŊ mi, kɔm Jehovah, kpukpru se idude mi ke esit, nyuŋ kɔm edisana enyiŋ esie.

² O ukpɔŋ mi, kɔm Jehovah, kunyuŋ ufre kpukpru nti enɔ esie:

³ emi efende kpukpru mme ukwaŋ-ŋkpɔ fo, onyuŋ ɔkɔkde kpukpru mme udɔŋɔ fo;

⁴ emi afakde uwem fo osio ke udi; onyuŋ adade ima ye mbɔm ayara fi ke ibuot;

⁵ emi adade eti ŋkpɔ ɔyuhɔ uyai fo; onyuŋ ɔdiɔŋ uyen fo nte ntrukpom.

⁶ Jehovah ekpe edinen ikpe ɔnɔ kpukpru mmɔ eke owo efikde.

⁷ Enye ama asian Moses usuŋ esie, asian nditɔ Israel se enye anamde.

⁸ Jehovah emenyene esit mbɔm ye mfɔnido, isɔpke iyaresit, ndien awak ima.

⁹ Enye itɔhɔke ke nsinsi; inyuŋ ikɔhɔkede ke nsi-nsi.

¹⁰ Enye inamke nnyin nte mme idiɔk ido nnyin esaŋade; inyuŋ isioho usiene ye nnyin nte mme ukwaŋ-ŋkpɔ nnyin edotde.

¹¹ Koro adaŋa nte enyɔŋ okoŋde akan isɔŋ, kpa ntre ke ima esie okpon ye mmɔ eke ebakde enye.

¹² Adaŋa nte edem usiaha-utin oyomde ye edem usop, kpa ntre ke enye ɔbɔ nnyin mme idiɔk ido nnyin onim anyan ebiet.

¹³ Kpa nte ete atuade nditɔ esie mbɔm, ntre ke Jehovah atua mmɔ eke ebakde enye mbɔm.

¹⁴ Koro enye ɔfiɔkde nte iborode; emeti ete ke nnyin idi ntan.

¹⁵ Ama edi owo, mme usen esie etie nte mbiet: nte ikɔŋ iŋwaŋ, kpa ntre ke enye asiaha.

¹⁶ Koro ofum abarede ke esit, ndien enye iduhe aba; ebiet esie idinyuŋ idiɔŋɔke aba enye.

¹⁷ Edi ima Jehovah ebigi ke nsinsi-nsinsi ye mmɔ eke ebakde enye, edinen ido esie onyuŋ ebigi ye nditɔ nditɔ;

¹⁸ ye mmɔ eke enimde ediomi esie, ye mmɔ eke etide mme ewuhɔ esie enyuŋ enamde mmɔ.

¹⁹ Jehovah omowuk ebekpo esie ke heaven; itie ubɔŋ esie omonyuŋ akara kpukpru.

²⁰ Etoro Jehovah, mbufo mme angel esie, emi edahade uko, emi enamde uyo esie, enyuŋ ekopde uyo ikɔ esie.

²¹ Etoro Jehovah, mbufo ofuri udim esie, mme asaŋutom esie, emi enamde se enye amade.

²² Etoro Jehovah, mbufo kpukpru se enye anamde ke kpukpru ebiet emi enye akarade: ukpɔŋ mi, kɔm Jehovah.