ŊWED MME PSALM 10 - Edisana ñwed Abasi Ibom

O Jehovah, Sio Eyen Ukut ke Ubɔk Mme Asua

¹ O JEHOVAH, nsinam afo adade anyan ebiet? Nsinam odibede ke ini nnanenyin?

² Oto ke iseri mme idiɔk owo mme ubuene ekut ndutuhɔ: emum mmɔ ke mme uduak emi mmɔ (mme idiɔk owo) eduakde.

³ Koro idiɔk owo oburede ke udɔŋ ukpɔŋ esie; onyuŋ otoro uŋwo,

⁴ esin Jehovah ke ndek. Idiɔk owo ke akwa iseri esie idiyomke (Abasi): “Abasi iduhe” edi ofuri ekikere esie.

⁵ Ido esie ɔsɔŋ kpukpru ini; mme item fo ekoŋ ekan nte enye okutde: ama edi kpukpru mme asua esie, enye ofuri mmɔ efep.

⁶ Enye ɔdɔhɔ ke esit esiemɔ, ete, Ndisehekede; ke ofuri emana ami ndi owo emi mididuhe ke idiɔk.

⁷ Isuŋi, ye nsu, ye utuk ke eyɔhɔ enye ke inua; ibak ye idiɔk ido edak enye ke edeme.

⁸ Enye etie ke ebiet udibe mme obio iŋwaŋ; ke ndibe ke enye owot owo eke miduehe; enyin esie odibe ebet mbon-ukut.

⁹ Enye ana ke ndibe, nte lion ke ebiet nna esie; odibe ebet, ete imum ubuene: enye omum ubuene ke ini odudide enye esin ke iyire esie.

¹⁰ Ndien enye anuaha ɔduɔ; mkpɔsɔŋ ikɔt esie esin mbon ukut eduɔŋɔ.

¹¹ Enye ɔdɔhɔ ke esit esie, ete, Abasi emefre: omodip iso esie; idikwe ke nsinsi.

¹² Daha ke enyɔŋ, O Jehovah, menere ubɔk fo ke enyɔŋ, O Abasi: kufre mbon ukut.

¹³ Idiɔk owo anam didie esin Abasi ke ndek? Ɔdɔhɔ ke esit esie, ete, “Afo udubupke.”

¹⁴ Afo omokut; koro afo etiŋde enyin ese ibak ye iyaresit man ada mmɔ esin ke ubɔk fo: eyen ukut ayak idem ɔnɔ fi; afo edi iberedem eyen-akpa.

¹⁵ Buŋ idiɔk owo ubɔk: ama edi oburobut owo, afo eyeyom idiɔk ido esie, ndien udukwe enye.

¹⁶ Jehovah edi edidem ke nsinsi nsinsi: emesobo mme idut ke isɔŋ esie efep.

¹⁷ O Jehovah, afo omokop se mbon ukut eyomde: eyesɔŋ mmɔ esit, eyekpaŋ utɔŋ fo;

¹⁸ man afo ekpe ikpe eyen-akpa ye eyen-ukut; owo eke otode ke ntan-isɔŋ iditɔŋɔke aba ntak isin mmɔ ndik.