ŊWED MBON ROME 9 - Edisana ñwed Abasi Ibom

Abasi ye Ikɔt Esie

¹ MMETIŊ akpanikɔ ke Christ nsuhu nsu, esit mi onyuŋ etiene mi edi ntiense ke Edisana Spirit, ete,

² mmenyene akwa mfuhɔ ye ubiak emi midoboke ke esit mi.

³ Koro ŋkpoyom nte ekpadianare mi ke Christ nte ŋkpɔ-nsobo, man ɔfɔn ye nditɔ-ete mi, oruk mi ke obukidem:

⁴ emi edide nditɔ Israel; ekeda mmɔ esin ke ubon Abasi; uyama ubɔŋ (Abasi), ye mme ediomi, ye erinɔ ibet, ye eriwa uwa nnɔ Abasi, ye mme uŋwɔŋɔ enyuŋ enyene mmɔ: mme ete enyuŋ edi eke mmɔ:

⁵ Christ okonyuŋ oto ke otu mmɔ ke obukidem Esie: Enye edi Andikara kpukpru ŋkpɔ, Abasi, emi enyenede itoro ke nsinsi. Amen.

⁶ Edi idige nte ŋkpɔ eke ikɔ Abasi amakabare edi ikpikpu. Koro idige kpukpru mmɔ emi etode ke ubon Israel edi Israel;

⁷ mmɔ kpukpru inyuŋ idige nditɔ Abraham emi edide ubon Abraham; edi, Ke Isaac ke edikot ubon fo.

⁸ Emi ɔwɔrɔ ete, idige nditɔ obukidem edi nditɔ Abasi, edi ebat nditɔ uŋwɔŋɔ ke ata ubon,

⁹ Koro emi edi ikɔ uŋwɔŋɔ, ete, Adaŋa ini ntem nyedi, ndien Sarah eyeman eyen.

¹⁰ Ikureke adaŋoro; edi Rebecca ŋko okoyomo idibi ɔnɔ owo kiet kpa ete nnyin Isaac;

¹¹ Ndien ke ini nditɔ mimanake kaŋa, minyuŋ inamke baba eti ŋkpɔ kiet mme idiɔk-ŋkpɔ, edɔhɔ eka mmɔ ete, Akpan eyenam ŋkpɔ ɔnɔ udɔ:

¹² man oto do uduak Abasi, emi asaŋade ye erimek, ɔkpɔsɔŋɔ ada, nte ŋkpɔ eke mitoho ke se owo anamde, edi otode ke Andikot.

¹³ Kpa nte ewetde ete, Jacob ke ŋkama, edi ŋkasua Esau.

¹⁴ Nso ke ididɔhɔ ndien? Nte ididɔhɔ ite, Abasi; ɔdiɔk ndinam?

¹⁵ Nsa nnyin O! Koro Enye ɔdɔhɔ Moses ete, Nyetua owo mbɔm eke ntuade, nyenyuŋ mfɔn ye owo eke mfɔnde.

¹⁶ Mmɔdo ŋkpɔ emi itoho owo emi oyomde yom, inyuŋ itoho owo emi efehede itɔk, edi oto Abasi emi enyenede mbɔm.

¹⁷ Koro Ŋwed Abasi ɔdɔhɔ Pharaoh ete, Edi emi ekesin Mi nnim fi Man nda fi ŋwut odudu Mi, Man enyuŋ etaŋa enyiŋ Mi ke ofuri isɔŋ.

¹⁸ Ntre ke Enye enyene mbɔm ye owo eke Enye amade, onyuŋ ɔsɔŋ owo esit nte amade.

¹⁹ Afo eyedɔhɔ mi ndien ete, Nsidi ntak Enye eyirede nditɔhɔ ye owo? Koro anie akaŋwana ye uduak Esie?

²⁰ Edi afo edi anie, O owo, emi ɔbɔrɔde adian Abasi ntem? Nte ŋkpɔ eke ebotde ekeme ndidɔhɔ andibot enye ete, Nsinam afo okobotde mi ntem?

²¹ Mme nte obot-eso inyenede unen ndisio ubak mbat kiet mbot eso nnim nnɔ itie ukpono, nnyuŋ nsio ubak mbat eken mbot eso nnim nnɔ usuhɔre-itie?

²² Edi ekpedi nte Abasi, emi onyimede ndiwut iyaresit Esie, ndiyuŋ nnam owo efiɔk odudu Esie, emede anyan ime ye mme eso iyaresit emi enade enɔ nsobo;

²³ man oto do Enye akpayarare uwak ubɔŋ Esie ke idem mme eso mbɔm, emi Enye ekebemde iso onim ɔnɔ ubɔŋ;

²⁴ kpa nnyin, emi Enye okonyuŋ okotde, idige ke otu mme Jew ikpɔŋ, edi ke otu mme Gentile nde?

²⁵ Nte emi Enye ɔdɔhɔde ke ŋwed Hosea ŋko, ete, Nyekot mmɔ emi mikedige ikɔt Mi, nte, ikɔt Mi, Nyenyuŋ ŋkot enye emi mikedige ŋkpɔ ima, nte edima ŋwan;

²⁶ Ndien ama ekem, ke ebiet eke ekɔdɔhɔde mmɔ ete, mbufo idige ikɔt Mi, Kpa do ke edikot mmɔ nditɔ Abasi uwem.

²⁷ Edi Isaiah ofiori abaŋa Israel ete, Ibat nditɔ Israel akpawakde nte ntan mben inyaŋ, edi nsuhɔ ke edinyaŋa:

²⁸ koro Jehovah eyenam se Enye ɔkɔdɔhɔde ke isɔŋ, anam uyo Esie ama, onyuŋ ebiere enye ibibio.

²⁹ Ŋko, kpa nte Isaiah ekebemde iso ɔdɔhɔ ete, Ke mikpedige Jehovah mme udim ayak ubon ɔsuhɔ ɔnɔ nnyin. Nnyin ikpakabare itie nte Sodom, ikponyuŋ ibiet Gomorrah.

³⁰ Ididɔhɔ didie ndien? Ite, mme Gentile, emi mikaŋwanake nditiene edinen ido, ema esim edinen ido, kpa edinen ido eke otode ke mbuɔtidem:

³¹ edi Israel, emi eŋwanade nditiene ibet eke akpadade edinen ido ɔsɔk owo, ikosimke ibet oro.

³² Ntak asaŋa didie? Koro mmɔ mikadaha mbuɔtidem iyom enye, edi nte edade erinam utom eyom.

³³ Mmɔ etuak ukot eduɔ ke itiat iduɔ; kpa nte ewetde ete, Sese mmonim itiat iduɔ ke Zion, Ye akwa itiat emi anamde owo ɔduɔ; Owo eke ɔbuɔtde idem ye Enye idinyuŋ ikwe but.