ŊWED MBON ROME 5 - Edisana ñwed Abasi Ibom

Abasi Anam Ikpe Etebe Nnyin Oto ke Christ Jesus

¹ MMƆDO sia ema ekeda mbuɔtidem enam ikpe etebe nnyin, nnyin imenyene emem ye Abasi oto ke Ɔbɔŋ nnyin Jesus Christ.

² Ndien oto ke Enye ke nnyin ikasaŋa ke mbuɔtiden iduk ke itie mfɔn eke nnyin idade ke esit, imonyuŋ ibure mbure ke idori-enyin ubɔŋ Abasi.

³ Akan oro, edi nnyin imobure mbure ke ukut nnyin ŋko, sia ifiɔkde ite ukut ɔwɔrɔ ime;

⁴ ime, onyuŋ ɔwɔrɔ eti edu, eti edu onyuŋ ɔwɔrɔ idori enyin:

⁵ Ndien idori-enye emi iyakke nnyin ikut but, koro Abasi amaŋwaŋa ima Esie esin ke esit nnyin oto ke Edisana Spirit emi Enye ɔkɔnɔde nnyin.

⁶ Koro ke adaŋemi nnyin ikodude kaŋa ke mmem-idem, ke edikem ini Christ akpa ke ibuot mmɔ emi miteŋeke Abasi.

⁷ Ke akpanikɔ ɔsɔŋ eti-eti owo ndikpa ke ibuot edinen owo; ndusuk, owo ekpekeme ndinyime ndikpa ke ibuot owo mfɔn-ido.

⁸ Edi Abasi otim ayarare ima eke amade nnyin, ke emi Christ akpade ke ibuot nnyin ke adaŋemi nnyin isuk idide mme idiɔk owo kaŋa.

⁹ Ŋwaŋwaediso ndien, sia ema enam ikpe etebe nnyin ke emi ke iyip Esie, ke enyenyaŋa nnyin esio ke iyat esit oto ke Enye.

¹⁰ Koro edieke Abasi akadade mkpa Eyen Esie esin emem ke ufɔt nnyin ye Idem Esie ke adaŋemi nnyin ikedide mme asua, ŋwaŋwaediso, sia ima ikabare itie ke emem ye Enye, ke Abasi eyeda uwem Eyen Esie anyaŋa nnyin.

¹¹ Itreke do ikpɔŋ, edi nnyin imonyuŋ ibure mbure ke Abasi, oto ke Ɔbɔŋ nnyin Jesus Christ, emi edide Enye akada nnyin oduk ke emem ye Abasi ke emi.

¹² Mmɔdo, nte idiɔk-ŋkpɔ okotode owo kiet oduk ke ererimbot, mkpa onyuŋ otode ke idiɔk-ŋkpɔ oro oduk; mkpa onyuŋ ebe osim kpukpru owo, koro kpukpru owo ema enam idiɔk-ŋkpɔ;

¹³ koro idiɔk-ŋkpɔ ama ododu ke ererimbot ndien edinɔ ibet; edi ibatke idiɔk-ŋkpɔ inɔ owo ke ibet miduhe.

¹⁴ Edi mkpa ɔtɔŋɔ ke Adam ada ubɔŋ tutu osim Moses, akara kpa mmɔ emi mikanamke idiɔk-ŋkpɔ eke ebietde idiɔk-ŋkpɔ Adam; emi edide mbiet Owo oro enyenede ndidi.

¹⁵ Edi enɔ mfɔn Abasi itiehe nte ndudue oro; koro ndudue owo kiet akada mkpa osim ata ediwak owo; ŋwaŋwaediso ke mfɔn Abasi ye enɔ emi otode ke mfɔn owo kiet, kpa Jesus Christ, awak akan ɔnɔ ediwak owo.

¹⁶ Enɔ mfɔn inyuŋ ibietke se itode ke ndudue andidue kiet; koro ikpe okoto ke ndudue kiet obiom owo; edi enɔ mfɔn ɔwɔrɔ utebe-ikpe ɔnɔ medue ekese ndudue.

¹⁷ Koro edieke okotode ke ndudue owo kiet ke mkpa ada ubɔŋ oto owo kiet oro, ŋwaŋwaediso ke mmɔ emi ebɔde uwak mfɔn ye uwak enɔ edinen ido eyeda ubɔŋ ke uwem oto owo kiet, Jesus Christ.

¹⁸ Mmɔdo ndien, nte otode ke ndudue kiet ke ebiom kpukpru owo ikpe; kpa ntre ŋko oto ke utom edinen ido kiet ke enɔ mfɔn osim kpukpru owo, etebe mmɔ ikpe ke uwem.

¹⁹ Koro nte ekedade nsɔŋ-ibuot owo kiet enam ediwak owo ekabare edi midiɔk owo, kpa ntre ke eyeda nsuk-ibuot owo kiet enam ediwak owo ekabare edi ndinen owo.

²⁰ Edi ibet oduk edi man ndudue ewak ekan: edi ɔtɔ nte idiɔk-ŋkpɔ awakde, mfɔn ɔdɔdiɔŋ awak do akan:

²¹ man nte idiɔk-ŋkpɔ akadade ubɔŋ ke mkpa, kpa ntre ŋko mfɔn akpada ubɔŋ oto ke edinen ido, ɔwɔrɔ nsinsi uwem oto ke Jesus Christ Ɔbɔŋ nnyin.