ŊWED MBON ROME 4 - Edisana ñwed Abasi Ibom

Yak Abraham Edi Uwut-Ŋkpɔ Ɔnɔ Nnyin

¹ NSO ndien ke nnyin ididɔhɔ ibaŋa Abraham, emi edide akwa ete nnyin ke obukidem?

² Edieke ekadade erinam utom etebe Abraham ikpe, enye ekpenyene ntak ndibure mbure Edi enye ikenyeneke ntak mbure ke iso Abasi.

³ Koro ŋwed Abasi ɔdɔhɔ didie? ete, Edi Abraham ɔbuɔtidem ye Abasi, ndien ebat oro enɔ enye ke edinen ido.

⁴ Edi ye owo emi anamde utom, ibatke utip eke enɔde enye nte ŋkpɔ mfɔn, edi ebat nte isɔn.

⁵ Edi ye owo eke minamke utom, edi ɔbuɔtde idem ye Enye emi anamde ikpe etebe mme idiɔk owo, ebat mbuɔtidem esie ke edinen ido.

⁶ Kpa nte David ŋko etiŋde ikɔ eridiɔŋ abaŋa owo oro Abasi abatde edinen ido eke misaŋake ye erinam utom ɔnɔ enye,

⁷ ete, Ɔfɔfɔn ɔnɔ mmɔ emi efende mme idiɔk ido mmɔ, Enyuŋ efukde mmɔ.

⁸ Ɔfɔfɔn ɔnɔ owo emi Jehovah midibatke mme ukwaŋkpɔ inɔ enye.

⁹ Nte ke etiŋ ikɔ eridiɔŋ emi enɔ mmɔ emi enade mbobi, mme etiŋ enɔ mmɔ emi minaŋa mbobi ŋko? nnyin idɔhɔ ite, Ekebat mbuɔtidem Abraham enɔ enye nte edinen ido.

¹⁰ Ekebat edidie? Ndi ke ini eke enye anade mbobi, mme ke ini eke minaŋa mbobi? idige ke ini eke enye anade mbobi, edi ke ini eke enye minaŋa;

¹¹ ndien enye ɔkɔbɔ mbobi nte idiɔŋɔ, ndinam edinen ido mbuɔtiden emi enye ekenyenede ke ini enye minaŋa mbobi kaŋa ɔsɔŋɔ ada; man oto do enye ekpedi ete kpukpru mmɔ emi ebuɔtde idem, okposuk edi nte mmɔ minaŋa mbobi, man ebat edinen ido enɔ mmɔ;

¹² okponyuŋ edi ete mbobi ɔnɔ mmɔ emi midige mbon mbobi ikpɔŋ-ikpɔŋ, edi enyuŋ esaŋade ke nde ikpat mbuɔtidem, emi ete nnyin Abraham ekenyenede ke ini enye minaŋa mbobi kaŋa.

¹³ Koro itoho ke ibet ke ekenɔ Abraham ye nditɔ esie uŋwɔŋɔ, ete enye edida ererimbot enyene, edi oto ke edinen ido eke mbuɔtidem adade edi.

¹⁴ Koro edieke edide mbon ibet eda ererimbot enyene, mbuɔtidem ama akabare edi ikpikpu, uŋwɔŋɔ ama onyuŋ akabare okpu:

¹⁵ koro ibet anam ifuresit odu; edi ɔtɔ nte ibet miduhe, eribiat ibet inyuŋ iduhe ŋko.

¹⁶ Ke ntak emi uŋwɔŋɔ asaŋa ye mbuɔtidem, man edi ŋkpɔ mfɔn; man oto do uŋwɔŋɔ ɔkpɔsɔŋɔ ada ɔnɔ kpukpru nditɔ esie; ikpɔsɔŋɔke ida inɔ mbon ibet ikpɔŋ, edi ɔnɔ mmɔ nde emi enyenede mbuɔtidem Abraham,

¹⁷ emi edide ete nnyin kpukpru (nte ewetde ete, Mmanam fi edi ete ediwak mme idut) ke enyin Esie emi enye ɔbuɔtde idem ye Enye, kpa Abasi, emi anamde mme akpa-mkpa edu uwem, onyuŋ okotde se miduhe nte ŋkpɔ eke edude.

¹⁸ Abraham osuk odori enyin onim ke akpanikɔ ke ini idori-enyin miduhe, man enye ekpedi ete ediwak mme idut, kpa nte ekedɔhɔde enye ete, Ntem ke ubon fo editie.

¹⁹ Enye ese ikpɔhidem esiemɔ, emi etiede adaŋaro nte ŋkpɔ eke ama akpa (sia enye adaŋde isua ikie ke uwem), onyuŋ okut nte Sarah ebede idaha uman;

²⁰ edi mbuɔtidem ibɔhɔke enye: enye owuk enyin ese uŋwɔŋɔ Abasi, inyuŋ iyikke ke unana mbuɔtidem, edi akabare enyene odudu oto ke mbuɔtidem, ɔnɔ Abasi ubɔŋ:

²¹ onyuŋ otim obure ɔfiɔk ete, Abasi ekeme ŋko ndinam se Enye ɔkɔŋwɔŋɔde.

²² Emi edi ntak eke ebatde mbuɔtidem esie enɔ enye ke edinen ido.

²³ Edi ikewetke ite ekebat enɔ enye kabaŋa idem esie ikpɔŋ;

²⁴ ekewet kabaŋa nnyin ŋko; edibat mbuɔtidem enɔ nnyin, emi ibuɔtde idem ye Enye emi akanamde Jesus Ɔbɔŋ nnyin eset ke mkpa;

²⁵ emi ekeyakde enɔ kabaŋa ndudue nnyin, ekenyuŋ enamde Enye eset, man ikpe etebe nnyin.