ŊWED MBON ROME 3 - Edisana ñwed Abasi Ibom

Kpukpru Owo Ema Enam Idiɔk-Ŋkpɔ

¹ DIDIE ke Jew akan owo eken ndien? erina mbobi onyuŋ ɔfɔn ke nso?

² Ɔfɔn eti-eti ke kpukpru usuŋ. Ke akpa itie, ekeyak ikɔ Abasi esin mmɔ ke ubɔk.

³ Ɔwɔrɔ didie ndien? Edieke ndusuk mmɔ mikanamke akpanikɔ nte unana akpanikɔ mmɔ edinam akpanikɔ Abasi okpu? Idige ntre.

⁴ Yak ewut ete Abasi edi akpanikɔ, kpukpru owo ekpedi mme osu-nsu nte ewetde ete, Man ekpetebe Fi ke ikɔ Fo. Afo onyuŋ akan ke ini ekpede ikpe ye Afo.

⁵ Edi edieke mme ukwaŋkpɔ nnyin eyararede edinen ido Abasi ewut, nso ke nyin ididɔhɔ? Nte Abasi ɔdiɔk ndinam ke ini Enye adade iyat esit amia owo ufen? (ntetiŋ nte owo). Idige ntre.

⁶ Koro edieke edide ntre, Abasi edinam didie ekpe ererimbot?

⁷ Edi edieke otode ke nsu mi akpanikɔ Abasi awak akan, anam Enye enyene ubɔŋ, nsidi ntak ndien eke esuk ekpede, ikpe ye ami nde nte anam-idiɔk?

⁸ nsinyuŋ ikpan nnyin ndinam idiɔk man ufɔn ɔwɔrɔ? (nte edoride nnyin ikɔ ke edem, ndusuk owo enyuŋ edɔhɔde ete ke nnyin itiŋ ntem). Mmɔ emi etiŋde ntem edot ubiom-ikpe.

⁹ Nso naŋa? Nte itie nnyin ɔfɔn akan eke mmɔ? Ke baba usuŋ kiet. Koro nnyin imebebem iso idori mme Jew ye mme Greek, ite kpukpru mmɔ esine ke idak idiɔk-ŋkpɔ;

¹⁰ nte emi ewetde ete, Baba owo kiet eke enende iduhe, baba owo kiet;

¹¹ Baba owo kiet eke enyenede eti ibuot iduhe, Baba owo kiet eke oyomde Abasi iduhe;

¹² Kpukpru mmɔ emewaha ekpɔŋ usuŋ, mmɔ kpukpru emekabare ediɔk; Baba owo kiet eke anamde eti iduhe, baba mkpasip kiet:

¹³ Odudu itɔŋ mmɔ edi ana-iŋwaŋ udi: mmɔ eda edeme mmɔ ebiaŋa abiaŋa Ifɔt ibɔm odu mmɔ ke idak mkpɔk-inua:

¹⁴ Isuŋi ye ndot-ndot ikɔ eyɔhɔ mmɔ ke inua:

¹⁵ Ikpat mmɔ esɔp ndiduɔk iyip

¹⁶ Nsobo ye nditaha odu ke usuŋ mmɔ;

¹⁷ Mmɔ inyuŋ ifiɔkke usuŋ emem:

¹⁸ Baba uteŋe Abasi iduhe mmɔ ke iso.

¹⁹ Edi nnyin imɔfiɔk ite se ededi eke ibet etiŋde, ke etiŋ ɔnɔ mmɔ emi edude ke idak ibet; man inua ɔkibɔ kpukpru owo, ofuri ererimbot enyuŋ esine ke idak ubiom-ikpe Abasi:

²⁰ koro ikpe iditebeke baba owo kiet ke iso Esie kabaŋa erinam utom ibet, koro ifiɔk idiɔk-ŋkpɔ otode ke ibet.

²¹ Edi ke emi ema eyarare edinen ido eke Abasi eke misaŋake ye ibet, edi ibet ye mme prophet edi mme ntiense enɔ enye;

²² edi edinen ido eke Abasi, emi otode ke mbuɔtidem ke Jesus Christ, osim kpukpru owo emi enimde ke akpanikɔ. Koro ubahare iduhe ke otu owo:

²³ koro kpukpru owo ema enam idiɔk-ŋkpɔ, enyuŋ etaba ubɔŋ Abasi.

²⁴ Edi etebe mmɔ ikpe ke ikpikpu ke mfɔn Esie, oto ke erifak emi odude ke Christ Jesus:

²⁵ emi Abasi okosiode onim ete edi uwa emem ke iyip Esie, oto ke mbuɔtidem; man Abasi ayarare edinen ido Esie, sia Enye ke ime osioŋode idem efep ke mme idiɔk-ŋkpɔ emi owo ekenamde ke ini eke ebede;

²⁶ man onyuŋ ayarare edinen ido Esie ke ini emi, ete Imɔ ke Idem Imɔ idi edinen, inyuŋ inam ikpe etebe owo eke ɔbuɔtde idem ke Jesus.

²⁷ Enye-e mbure ndien? Ema esio enye efep. Oto ke nso oruk ntak? ke ntak utom? Baba, oto ke ntak mbuɔt idem.

²⁸ Koro nnyin ibat ite eda mbuɔtidem enam ikpe etebe owo, erinam utom ibet inyuŋ isaŋake do.

²⁹ Midige ntre, nte Abasi edi Abasi mme Jew ikpɔŋ? Nte Enye inyuŋ idige Abasi mme Gentile nde? Ke akpanikɔ Enye edi Abasi mme Gentile nde; sia Abasi edide Abasi kiet,

³⁰ emi edidade mbuɔtidem anam ikpe etebe mmɔ emi enade mbobi, edinyuŋ adade kpa mbuɔtidem oro anam ikpe etebe mmɔ emi minaŋa mbobi.

³¹ Nte nnyin ida mbuɔtidem emi inam ibet ɔwɔrɔ ikpikpu naŋa? Baba, nnyin inam ibet ɔsɔŋɔ ada.