ŊWED MBON ROME 2 - Edisana ñwed Abasi Ibom

Edinen Ikpe Abasi

¹ MMƆDO, O owo ekededi eke ekpede ikpe ɔnɔ owo, afo unyeneke se etiŋde anyaŋa idem; koro ke erikpe emi ekpede owo efen oro ke obobiom idem fo; koro afo emi ekpede ikpe anamde kpa ŋkpɔ oro.

² Edi nnyin imɔfiɔk ite ubiere-ikpe Abasi asaŋa ekekem ye akpanikɔ obiom mmɔ emi enamde oruk ŋkpɔ emi.

³ Edi O owo, emi ekpede ikpe mme anam oruk ŋkpɔ emi, onyuŋ anamde kpasuk ntre, nte abat ete imɔ iyebɔhɔ ubiere-ikpe Abasi?

⁴ Midige, mme esin uwak mfɔnido ye ndidop ye anyan ime Esie ke ndek, ke mufiɔkke ete mfɔnido Abasi ada fi oduk ke erikabare esit?

⁵ edi ke nsɔŋesit fo ye unana erikabare-esit fo, ɔkɔ iyaresit onim ɔnɔ idem fo ke usen iyaresit ye eriyarare edinen ubiere-ikpe Abasi;

⁶ emi edinɔde kpukpru owo kiet nte ekemde ye utom esie.

⁷ Enye eyeda nsinsi uwem ɔnɔ mmɔ emi eyirede ke erinam eti ido eyom ubɔŋ ye ukpono ye uwem eke midibiarake:

⁸ edi iyaresit ye ifuresit eyetiene mmɔ emi edide mbon ndomo-idem, minyuŋ isukke ibuot inɔ akpanikɔ, edi esukde idem enɔ ukwaŋido.

⁹ Ukut ye ɔkpɔsɔŋ ndutuhɔ eyedoro kpukpru ukpɔŋ owo eke enamde idiɔk-ŋkpɔ, odoro Jew ke akpa-itie, onyuŋ odoro Greek ŋko;

¹⁰ edi ubɔŋ ye ukpono ye emem eyedoro kpukpru owo eke enamde eti ido, odoro Jew ke akpa-itie, onyuŋ odoro Greek ŋko:

¹¹ Koro Abasi miteŋeke owo enyin.

¹² Koro adaŋa owo nte ekenamde idiɔk-ŋkpɔ nte mme anana-ibet, nte mme anana-ibet ke eyenyuŋ etak; ndien kpukpru mmɔ emi ekenamde idiɔk-ŋkpɔ ke idak ibet, ke eyeda ibet ekpe ikpe ye mmɔ:

¹³ koro idige mme okop-ibet edi ndinen owo ke iso Abasi, edi ikpe eyetebe mme enim-ibet.

¹⁴ (Koro ke adaŋemi mme Gentile emi minyeneke ibet enamde ke erimehe se ibet etemede, edi esit mmɔ ɔnɔnɔ mmɔ item, okposuk edi nte mmɔ minyeneke ibet:

¹⁵ mmɔ eyarare erinim-ibet eke item oro ewetde ke esit mmɔ etemede, esit mmɔ enyuŋ etiene erinnim-ibet oro edi ntiense mmɔ, ekikere mmɔ enyuŋ eneni ye kiet eken, edori mmɔ ikɔ, midige, etebe mmɔ ikpe):

¹⁶ ke usen eke Abasi edibierede ndibe ŋkpɔ owo ke ubɔk Jesus Christ, nte gospel mi owutde.

¹⁷ Edi edieke afo ekerede enyiŋ Jew, onyuŋ eberide edem ke ibet,

¹⁸ onyuŋ oburede ke Abasi, onyuŋ ɔfiɔkde se Enye amade, onyuŋ odomode ŋkpɔ eke efɔnde ekan ama mmɔ, sia ema eda ibet ekpep fi;

¹⁹ onyuŋ onimde ete imɔ idi andida mme nnan usuŋ, ye uŋwana inɔ mmɔ emi edude ke ekim, ye anditeme mme ɔkɔi,

²⁰ Ye andikpep nsek-nditɔ, sia inyenede mbiet ifiɔk ye akpanikɔ ke ibet.

²¹ Afo emi ekpepde owo efen, nte ukpepke idem fo? afo emi ɔkwɔrɔde ete owo okuyip inɔ nte omoyip ke idem fo?

²² afo emi ɔdɔhɔde ete owo okusin efibe, nte emesin efibe? afo emi abatde ndem ke mbubiam, nte omowo ŋwo ke mme temple?

²³ afo emi oburede mbure ke ibet, nte emesuene Abasi ke eribiat ibet?

²⁴ Koro ewet ete, Oto mbufo ke esuŋi enyiŋ Abasi ke otu mme Gentile.

²⁵ Koro ke akpanikɔ mbobi ɔfɔn fi edieke ononim ibet; edi edieke edide abiat-ibet, mbobi fo amakabare nte ŋkpɔ eke munaŋa mbobi.

²⁶ Mmɔdo owo emi minaŋa mbobi ama onim mme item ibet, nte idibatke unana erina mbobi esie nte mbobi?

²⁷ Ndien owo emi minaŋa mbobi obukidem ama onim ibet, nte enye idikpehe ikpe inɔ fi emi edide abiat-ibet, okposuk edi nte afo enyenede ŋwed ibet onyuŋ anade mbobi?

²⁸ Koro idige owo emi edide Jew enyɔŋ-enyɔŋ edi ata Jew; inyuŋ idige enyɔŋ-enyɔŋ mbobi, emi esinede ke obukidem, edi ata mbobi:

²⁹ edi ata Jew edi enye edide Jew ke esit-esit; ata mbobi onyuŋ edi ŋkpɔ ɔwɔŋesit, odu ke spirit, iduhe ke item eke ewetde; itoro esie inyuŋ itoho owo, edi oto Abasi.