ŊWED MBON ROME 14 - Edisana ñwed Abasi Ibom

Kubiom Owo Ikpe

¹ EDARA owo eke minyeneke ɔkpɔsɔŋ mbuɔtidem, edi ekuneni ebaŋa mme mfaŋa esit esie.

² Owo kiet enyene mbuɔtidem ndidia udia ekededi; edi owo eke mbuɔtidem esie misɔŋke adia ŋwup.

³ Yak andidia okuse anditre ndidia ke mbio, anditre ndidia okunyuŋ ekpe ikpe ye andidia; koro Abasi ama adara enye.

⁴ Afo edi anie emi ekpede ikpe ye owo ete eŋwen? Enye oro ɔsɔŋɔde ada, enye ada ɔnɔ ete esiemɔ; enye onyuŋ ɔduɔde, ɔduɔ ɔnɔ ete esiemɔ. Edi enye eyenyuŋ ɔsɔŋɔ ada, koro Ɔbɔŋ ekemede ndinam enye ɔsɔŋɔ ada.

⁵ Owo kiet abat ete usen kiet edi ibet akan eken; edi owo eŋwen abat kpukpru usen ukem-ukem. Yak kpukpru owo kiet kiet obure se enye ekerede ɔfiɔk ke esit esie.

⁶ Owo eke okponode usen okpono enye ɔnɔ Ɔbɔŋ: owo eke onyuŋ adiade ŋkpɔ adia ɔnɔ Ɔbɔŋ, koro enye ɔnɔde Abasi ekɔm: enye eke minyuŋ idiaha etre ndidia ɔnɔ Ɔbɔŋ, enye ŋko onyuŋ ɔnɔ Abasi ekɔm.

⁷ Koro baba owo nnyin kiet iduhe uwem inɔ idem esie, baba owo kiet inyuŋ ikpaha inɔ idem esie.

⁸ Koro edieke nnyin idude uwem, ke idu inɔ Ɔbɔŋ; onyuŋ edieke ikpade, ke ikpa inɔ Ɔbɔŋ; ye idude du ndien, ye inyuŋ ikpade kpa nnyin inyene Ɔbɔŋ.

⁹ Koro Christ akakpa onyuŋ odu uwem abaŋa ŋkpɔ emi, man Enye ekpedi Ɔbɔŋ mme odu-uwem ye mme akpa-mkpa.

¹⁰ Nsinam ndien afo ekpede ikpe ɔnɔ eyen-ete fo? mme nsinam afo esede eyen-ete fo ke mbio? Koro kpukpru nnyin iyeda ke iso itie-ikpe Abasi.

¹¹ Koro ewet ete, Jehovah ete, Ma uwem Mi, kpukpru edɔŋ eyetɔŋɔ enɔ Mi, Kpukpru edeme eyenyuŋ enɔ Abasi itoro.

¹² Mmɔdo ndien kpukpru nnyin kiet kiet iyebuk mbuk ibaŋa idem nnyin inɔ Abasi.

¹³ Eyak nnyin ikukpe ikpe inɔ kiet eken aba. Edi ekam ebiere ntem, ete owo okunim ŋkpɔ iduɔ ke iso eyen-ete, okunyuŋ esin eyen-ete ɔduɔ.

¹⁴ Mmɔdiɔŋɔ nnyuŋ mbure mfiɔk ke Ɔbɔŋ Jesus, nte, baba ŋkpɔ kiet ke idem esie idige ibet; edit edieke owo esede ŋkpɔ ke ibet edi ibet ɔnɔ enye.

¹⁵ Koro edieke udia eke afo adiade anamde ŋkpɔ ɔdiɔk ye eyen-ete fo, afo usaŋake aba ke ima udu uwem. Kuda se afo adiade usobo owo emi Christ akakpade ke ibuot esie.

¹⁶ Ekuyak etiŋ idiɔk ebaŋa nti ido mbufo;

¹⁷ Koro Ubɔŋ Abasi idige edidia ŋkpɔ ye ediŋwɔŋ ŋkpɔ, edi edi edinen ido ye emem ye idaresit emi odude ke Edisana Spirit.

¹⁸ Owo eke asaŋade ke oruk usuŋ emi anam ŋkpɔ ɔnɔ Christ, eneŋere enem Abasi esit, onyuŋ okut itoro ke ubɔk owo.

¹⁹ Mmɔdo ndien eyak nnyin ibine ido eke enamde emem odu, ye ido eke nnyin ikemede ndida nnam kiet eken ɔkɔri ke uwem Abasi. Ekubiat ubɔk-utom Abasi ke ntak udia.

²⁰ Ke akpanikɔ kpukpru ŋkpɔ edi edisana, edi ifɔnke owo ndiwɔrɔ ndi ŋkpɔ-iduɔ ke ntak udia eke enye adiade.

²¹ Ɔfɔn nditre ndita unam nnyuŋ ŋwɔŋ wine, nnyuŋ nnam ŋkpɔ ekededi eke esinde eyen-ete fo atuak ukot ɔduɔ.

²² Mum se onimde ke akpanikɔ kama ke esit fo ke iso Abasi. Ɔfɔn ye enye eke mikopke nsua-nnɔ ke esit esie ibaŋa se enye adade ke eti ŋkpɔ.

²³ Edi edieke owo eke enyenede eyikhe ke esit esie adiade, enye enyene ubiom-ikpe, koro midige erinrim emi enye onimde ke akpanikɔ esin enye adia. Se ededi eke mitoho ke erinim ke akpanikɔ edi idiɔk-ŋkpɔ.