ŊWED MBON ROME 13 - Edisana ñwed Abasi Ibom

Owo Enyene Ndisuk Ibuot Nnɔ Ukara

¹ KPUKPRU owo esuk idem enɔ mme enyene-odudu emi ekarade; koro odudu iduhe ke mitoho Abasi; ndien mme enyene-odudu emi edude kemi, edi Abasi okonim mmɔ.

² Mmɔdo owo eke aŋwanade ye odudu emi aŋwana ye se Abasi okonimde: mmɔ emi eŋwanade eyenyuŋ eda ikpe esɔk idem.

³ Koro mme andikara idaha ndik isɔk mme anam eti ido, edi esɔk mme anam idiɔk ido. Nte oyom ete enyene-odudu okunam fi ndik? nam se ifɔnde, ndien eyebɔ itoro ke ubɔk esie:

⁴ koro enye edide anam-utom Abasi, man ŋkpɔ ɔfɔn ye afo. Edi edieke afo anamde se idiɔkde, fehe ndik; koro enye ikamake ofut ke ikpikpu: koro enye edi anam-utom Abasi, andisio usiene ndiyarare iyaresit ye enye emi anamde idiɔk.

⁵ Ntem ke ana nte mbufo esuk idem, idige ke ntak iyaresit oro ikpɔŋ, edi man esit okubiom mbufo ŋko.

⁶ Ke ntak emi ke mbufo enyuŋ enɔ utomo; koro mme andikara edide mme asaŋutom Abasi, emi esede ebaŋa mbubehe Esie kpukpru ini.

⁷ Enɔ kpukpru owo se idide udeme mmɔ: eda utomo enɔ mmɔ emi ekpebɔde utomo; eda utip enɔ mmɔ emi ekpebɔde utip; efehe mmɔ emi edotde ndik; ekpono mmɔ emi edotde ukpono.

⁸ Ekukama owo isɔn ebe ndima kiet eken. Koro owo eke amade owo efen ama onim ibet ama.

⁹ Koro uyo emi enɔde, ete, Kusin efibe, Kuwot owo, Kuyip inɔ, Kusin esit ke ŋkpɔ owo, ye ibet eŋwen ekededi eke odude, esine ke ikɔ kiet, emi etemede ete, Ma mbɔhiduŋ fo nte amade idem fo.

¹⁰ Ima inamke mbuɔhiduŋ idiɔk; ntem ima edi erinim ibet mma.

¹¹ Enyuŋ enam ntem, sia mbufo efiɔkde edikem ini, ete ini ekekem nte mme imɔ ikpedemere ke idap: koro erinyaŋa ekpere nnyin ke emi, akan nte ekekperede ke ini nnyin inimde ke akpanikɔ.

¹² Okoneyo ɔnyɔŋ ebe efep, uwem-eyo ke ekpere; eyak nnyin ifɔrɔre ndien utom ekim, inyuŋ isine ŋkpɔ-ekɔŋ uŋwana.

¹³ Yak nnyin isaŋa ukpono-ukpono, nte owo asaŋade ke uwemeyo; ikusaŋa ke otime-otime ido ye mbuŋwɔŋi, ikusaŋa ke use ye mbubiam ido, ikusaŋa ke utɔk ye ufup.

¹⁴ Emen Ɔbɔŋ Jesus Christ esine, ekunyuŋ ebeŋe ŋkpɔ enim enɔ idiɔk udɔŋ obukidem.