ŊWED MBON ROME 11 - Edisana ñwed Abasi Ibom

Mbɔm Emi Abasi Enyenede Ɔnɔ Ikɔt Esie Isreal

¹ MMƆDƆHƆ ndien nte, Mme Abasi okotop ikɔt Esie ɔduɔk? Idige ntre. Koro ami ŋko ndi eyen Israel, nto ke ubon Abraham, ye ke esien Benjamin.

² Abasi ikɔduɔkke ikɔt Esie emi Enye ekebemde iso ɔfiɔk. Mme nte mbufo ifiɔkke se Ŋwed Abasi ɔdɔhɔde ke se ewetde ebaŋa Elijah? adaŋa nte enye ekpede Abasi ubɔk abiat Israel ete,

³ Ɔbɔŋ, mmɔ emowot mme prophet Fo, enyuŋ ewuri mme itie uwa Fo: ami ikpɔŋ nsuhɔ, mmɔ ke enyuŋ eyom ndibɔ uwem mi.

⁴ Edi uyo Abasi ɔbɔrɔ enye didie? Mma nsuhɔ nnɔ Idem Mi thousand owo itiaba emi mikɔtɔŋɔke edɔŋ inɔ Baal.

⁵ Ntre ŋko ke nsuhɔ odu ke emi emekde mmɔ oto ke mfɔn.

⁶ Edi edieke otode ke mfɔn, itoho aba ke se mmɔ enamde: midige ntre, mfɔn idige aba mfɔn.

⁷ Idɔhɔ didie ndien? ite, Israel ikekwe se enye oyomde; edi mmɔ emi emekde ema ekut;

⁸ ndien esɔŋ mmɔ eken esit: nte ewetde ete, Abasi ɔkɔnɔ mmɔ spirit uyetidap Ye enyin eke mikwe usuŋ ye utɔŋ eke mikopke ikɔ, Tutu idem mfin emi.

⁹ David onyuŋ ɔdɔhɔ ete, Yak okpokoro mmɔ akabare edi afia ye mfine, Ye ŋkpɔ iduɔ ye usiene ɔnɔ mmɔ:

¹⁰ Yak enyin okim mmɔ, mmɔ ekukut usuŋ, Nyuŋ nuhɔ mmɔ edem kpukpru ini.

¹¹ Mmɔdɔhɔ ndien nte, Nte mmɔ oro ekatuak ukot man mmɔ eduɔŋɔ? Idige ntre. Edi oto ke ndudue mmɔ erinyaŋa okosim mme Gentile, man anam mmɔ efibe ufup.

¹² Edi edieke ndudue mmɔ anamde ererimbot okut uwak mfɔn, unana mmɔ onyuŋ akabarede edi uwak mfɔn ɔnɔ mme Gentile, ŋwaŋwaediso ke uyɔhɔ mmɔ edinam mfɔn odu.

¹³ Edi ndɔhɔ mbufo emi edide Gentile. Adaŋa nte ndide apostle mme Gentile, nsɔŋɔ ŋkpono itie-utom mi:

¹⁴ man adaŋa nte ededi, nnam oruk mi efibe ufup, nnyuŋ nnyaŋa ndusuk mmɔ.

¹⁵ Koro edieke eriduɔk emi eduɔkde mmɔ akabare ɔwɔrɔ erinam ererimbot etie ke emem ye Abasi, erida mmɔ nduk ke Obio Ubɔŋ Abasi ndien ediwɔrɔ nso ke mibɔhɔke erito ke mkpa ndu uwem.

¹⁶ Edieke akpa ubak asanade, ofuri ebok asana kpa ntre: onyuŋ edieke oruŋ asanade, mme ŋkɔk etie kpa ntre.

¹⁷ Edi edieke ekawakde ndusuk ŋkɔk efep, enyuŋ edade fi, emi edide olive ikɔt, ebahare esin ke otu mmɔ, afo onyuŋ akabare etiene mmɔ abuana isek-isek oruŋ olive;

¹⁸ kuseri iseri ye mme ŋkɔk oro: edi edieke afo eseride, idige afo ɔkɔhɔ oruŋ, edi oruŋ ɔkɔhɔ fi.

¹⁹ Afo edidɔhɔ ndien ete, Ekewak mme ŋkɔk efep, man eda mi ebahare esin.

²⁰ Edi ntre: ekewak mmɔ eduɔk oto ke unana mbuɔtidem mmɔ, afo onyuŋ ada do ke mbuɔtidem fo.

²¹ Kutaŋ idem, edi fehe ndik: koro edieke Abasi mikatuaha mme ŋkɔk emi etode ke eto mbɔm, Enye idinyuŋ ituaha fi mbɔm.

²² Ese mfɔn-ido ye nsɔŋ-ido Abasi ndien; nsɔŋ-ido ye mmɔ emi eduɔde; edi mfɔn-ido Abasi ye afo, edieke afo ɔsɔŋɔde omum mfɔn-ido Esie akama: midige ntre, eyekpi fi ŋko eduɔk.

²³ Onyuŋ edieke mmɔ miyireke unana mbuɔtidem mmɔ, eyeda mmɔ ŋko ebahare esin: koro Abasi emekeme nditɔŋɔ ntak nda mmɔ mbahare nsin.

²⁴ Koro edieke ekpide fi esio ke eto eke edide olive ikɔt ke uduot esie, enyuŋ edade fi ke ido eke mikemke ye uduot fo ebahare esin ke eti olive, ŋwaŋwa-ediso ke edida mme ŋkɔk emi etode ke idem olive ebahare esin ke idem olive mmɔ!

²⁵ Koro nyomke mbufo enana ifiɔk, nditɔ-ete, ebaŋa ndibe ŋkpɔ emi, ete nsɔŋ okomum Israel ubak-ubak, tutu uyɔhɔ ibat mme Gentile eduk edi, mbak mbufo edise idem mbufo ke mme ɔfiɔk-ŋkpɔ owo:

²⁶ ndien ke usuŋ emi ke eyenyaŋa ofuri Israel; kpa nte ewetde ete, Andinyaŋa eyeto ke Zion edi, Enye eyesio ukwaŋido efep ke Jacob:

²⁷ Ndien emi edi ediomi Mi ye mmɔ, Ke adaŋemi ndimende mme idiɔk-ŋkpɔ mmɔ mfep.

²⁸ Ke ŋkaŋ gospel, mmɔ edi mme asua kabaŋa mbufo: edi ke ŋkaŋ erimek, Abasi ama mmɔ kabaŋa mme ete mmɔ.

²⁹ Koro Abasi mituaha mkpɔfiɔk ibaŋa enɔ ye ikot Esie.

³⁰ Koro nte mbufo ekesɔŋde ibuot ye Abasi ke ini oko, edi ekutde mbɔm ke emi oto ke nsɔŋ-ibuot mmɔ,

³¹ kpa ntre ke mmɔ esɔŋ ibuot ke emi, kpaŋ mmɔ ŋko ekpekut mbɔm oto ke mbɔm eke etuade mbufo.

³² Koro Abasi ama okui kpukpru owo abaha ke nsɔŋ-ibuot, man Enye atua kpukpru owo mbɔm.

³³ Uwak ɔniɔŋ ye ifiɔk Abasi edituŋɔ adaŋa didie! Mme ikpe Esie ekak owo ndiduŋɔre adaŋa didie, onyuŋ ayaŋa owo nditiene nde usuŋ Esie.

³⁴ Koro anie ɔfiɔk ekikere Ɔbɔŋ?

³⁵ Anie okonyuŋ ɔnɔ Enye item? Anie okonyuŋ ebem iso ɔnɔ Enye ŋkpɔ, ndien eyetɔŋɔ ntak enɔ enye usiene?

³⁶ Koro kpukpru ŋkpɔ eto Enye, enyuŋ edu ke Enye, enyuŋ ena enɔ Enye. Ubɔŋ enyene Enye ke nsinsi. Amen.