ŊWED MBON EPHESUS 3 - Edisana ñwed Abasi Ibom

Iso Utom Emi Paul Akanamde ke Otu Mbon Idut

¹ KE ntak emi ami Paul, emi ndide owo-ŋkpɔkɔbi Christ Jesus mbaŋa mbufo mme Gentile—

² Ŋkɔm mbufo emekop ebaŋa ufɔn eke Abasi ekesinde mi ke ubɔk, ete nda ŋkama nnɔ mbufo;

³ adaŋa nte akayararede ndibe-ŋkpɔ ɔnɔ mi, nte mma mbem iso ŋwet ibio-ibio:

⁴ eke mbufo ekemede ndida ŋkot ŋkere, adaŋa nte ntimde mfiɔk ndibe-ŋkpɔ Christ:

⁵ emi nditɔ owo mikɔfiɔkke ke mme eyo oko, nte Spirit ama ayarare enye ke emi ɔnɔ nti apostle ye prophet;

⁶ ete, ke Christ Jesus, mme Gentile eyedi mme ebuana-udeme ye mme Jew, ye ndido idem kiet ye mmɔ, ye mme anditiene mmɔ mbuana ke uŋwɔŋɔ oto ke gospel:

⁷ emi ekanamde mi isuŋ esie, adaŋa nte enɔ mfɔn Abasi emi Enye ɔkɔnɔde mi edide, asaŋa ekekem ye utom eke odudu Esie anamde.

⁸ Ekenɔ mi, emi ŋkpride ŋkan ata andikpri ŋkan ke otu ikɔt Abasi, ufɔn emi, ete ŋkwɔrɔ nnɔ mme Gentile uwak inyene Christ, eke owo mikemeke ndiduŋɔre mma:

⁹ nnyuŋ nnam aŋwaŋa kpukpru owo enyin nte Abasi akadade ayarare ndibe-ŋkpɔ Esie, emi ɔtɔŋɔde mme eyo odibe ke Abasi, emi edide Andibot kpukpru ŋkpɔ:

¹⁰ Man oto do ke emi, ekpada ufɔk Abasi enam mme andikara ye mme enyene-odudu emi edude ke mme itie heaven efiɔk uwak-uwak ɔniɔŋ Abasi;

¹¹ nte asaŋade ekekem ye nsinsi uduak emi Enye akaduakde ke Christ Jesus Ɔbɔŋ nnyin:

¹² ke Enye ke nnyin inyuŋ inyene esit ndisaŋa ŋkpere Abasi ye uko, oto ke mbuɔtidem eke nnyin inyenede ye Enye.

¹³ Mmɔdo mmebeŋe mbufo nte, ekuyak idem eyemere mbufo abaŋa ukut eke ŋkutde ke ibuot mbufo; koro ukut emi edide ubɔŋ ɔnɔ mbufo.

¹⁴ Ke ntak emi ntɔŋɔ edɔŋ nnɔ Ete,

¹⁵ emi esiode kpukpru ubon ke enyɔŋ ye ke isɔŋ enyiŋ ke Enye,

¹⁶ nte, Enye akpakam ada Spirit Esie anam mbufo esɔŋɔ idem enyene odudu ke ukpɔŋ, nte ekemde ye uwak ubɔŋ Esie;

¹⁷ Christ akpakam onyuŋ oduŋ ke esit mbufo oto ke mbuɔtidem; mbufo ekpekam enyuŋ emum ŋkam enyuŋ esɔŋɔ ewuhɔ ke ima,

¹⁸ man mbufo ekeme nditiene kpukpru ikɔt Abasi ntim mfiɔk se idide ubom ye uniɔŋ ye ukoŋ ye utuŋɔ, nnyuŋ mfiɔk ima Christ emi ayaŋade ifiɔk;

¹⁹ man mbufo eyɔhɔ esim ofuri uyɔhɔ Abasi.

²⁰ Enye emi ekemede ndinam ŋkpɔ awak akan se nnyin ibeŋede inyuŋ ikerede, nte odudu Esie eke anamde utom ke idem nnyin edide,

²¹ yak ubɔŋ enyene Enye ke ufɔk Abasi ye ke Christ Jesus, ke kpukpru emana ke nsinsi nsinsi. Amen.