ŊWED MBON COLOSSAE 3 - Edisana ñwed Abasi Ibom

Ndidu Obufa Uwem Oto ke Christ

¹ EDIEKE ekanamde mbufo eset ye Christ ndien, eyom ŋkpɔ enyɔŋ, emi Christ odude do etie ke ubɔk nnasia Abasi.

² Esin esit ke ŋkpɔ enyɔŋ, ekusin ke ŋkpɔ isɔŋ.

³ Koro mbufo ema ekpa ema, uwem mbufo onyuŋ odibe ye Christ ke Abasi.

⁴ Ke adaŋemi Christ, emi edide uwem nnyin, edibiɔŋɔrede, adaŋoro ke mbufo ŋko eyebiɔŋɔre ye Enye ke ubɔŋ.

⁵ Mmɔdo ewot mbak idem mbufo emi edude ke isɔŋ. Ekpɔŋ use, ye ndek-ndek ido, ye idiɔk udɔŋ, ye idiɔk itɔŋ, ye erisin esit ke ŋkpɔ owo, emi edide ukpono-ndem;

⁶ mme ido emi eda iyaresit Abasi etiene nditɔ ntut-utɔŋ.

⁷ Mbufo ŋko ekesaŋa ke ido oro ke eyo oko, ke ini mbufo edude uwem ke esit.

⁸ Edi ke emi mbufo enyuŋ eduɔŋɔ kpukpru ido emi; esio iyaresit, ye ifuresit, ye udu, ye idiɔk ibaŋa, ye mbubiam ikɔ ke inua mbufo efep.

⁹ Ekusu nsu enɔ kiet eken, koro mbufo ema ekesio akani owo ye utom esie eduɔk,

¹⁰ ema enyuŋ esine obufa owo, emi ediɔŋde diɔŋ enam enye edi obufa, enyene mbiet Andibot enye, man enye ɔfiɔk ŋkpɔ;

¹¹ emi Greek mme Jew, mme ana mbobi me owo eke minaŋa mbobi, mme owo esit ikɔt, mme owo Scyntia, mme ofin mme eyen-isɔŋ miduhe ke enye, edi Christ edi kpukpru ŋkpɔ onyuŋ odu ke kpukpru ŋkpɔ.

¹² Nte mmɔ emi Abasi ekemekde, emi Abasi akanamde mmɔ esana onyuŋ amade, eda ndien esit mbɔm esine, ye mfɔn-ido, ye nsuk-idem, ye ifure-ifure ido, ye ime;

¹³ eme ime ye kiet eken, enyuŋ efen kiet eken, edieke owo mbufo ekededi enyenede ikɔ ye owo; kpa nte Ɔbɔŋ ekefende mbufo, efen mmɔ eŋwen kpasuk ntre.

¹⁴ Ndien ekɔrɔ ke kpukpru ŋkpɔ, esine ima, emi edide se ibɔpde uwem adiana inam ɔfɔn ama.

¹⁵ Eyak emem Christ akara ke esit mbufo; ekekot mbufo eduk ke idem kiet, man enyene emem oro.

¹⁶ Mbufo enyuŋ enyene esit ekɔm. Eyak ikɔ Christ odu ɔyɔhɔ-ɔyɔhɔ ke esit mbufo ke kpukpru eti ibuot; emen psalm ye hymn ye ikwɔ uwem spirit ekpep enyuŋ eteme kiet eken, ekwɔ itoro enɔ Abasi ye esit ekɔm.

¹⁷ Sededi mbufo enyuŋ enamde ke ikɔ ye utom enam kpukpru ke enyiŋ Ɔbɔŋ Jesus, enɔ Ete ekɔm oto ke Enye.

¹⁸ Iban, esuk idem enɔ mme ebe mbufo, nte odotde ke Ɔbɔŋ.

¹⁹ Mme ebe, ema iban mbufo, ekunyuŋ esɔŋ ido ye mmɔ.

²⁰ Nditɔ esuk ibuot enɔ mme ete mbufo ye mme eka mbufo ke kpukpru ŋkpɔ, koro emi enemde Ɔbɔŋ esit.

²¹ Mme ete, ekufiomo nditɔ mbufo, mbak esit ediduɔ mmɔ.

²² Ifin, esuk ibuot enɔ mme ete-ufɔk mbufo ke obukidem ke kpukpru ŋkpɔ; ekunam utom enyin owo, nte mbon mbukpek, edi enam ye esit kiet ke uteŋe Ɔbɔŋ.

²³ Sededi eke mbufo enamde, enam ke ofuri esit, nte ŋkpɔ eke enamde enɔ Ɔbɔŋ, minamke inɔ owo;

²⁴ sia mbufo efiɔkde ete iyebɔ Ɔbɔŋ udeme nte utip mbufo. Mbufo enam utom enɔ Christ Ɔbɔŋ.

²⁵ Koro owo eke anamde se idiɔkde eyebɔ utip idiɔk ŋkpɔ oro enye akanamde; Abasi iteŋeke owo enyin.