ŊWED ESEME 2 - Edisana ñwed Abasi Ibom

Ukut ye Ufen Emi Esimde Zion oto Abasi

¹ ƆBƆŊ anam didie ada ekim ofuk adiaha Zion ke iyaresit esie, osio uyai Israel ke enyɔŋ ɔduɔk ke isɔŋ, inyuŋ itihi udori-ukot esie ke usen iyaresit esie!

² Ɔbɔŋ omosobo kpukpru mme iduŋ Jacob, inyuŋ ituaha owo mbɔm: enye omowuri mkpɔsɔŋ ebiet adiaha Judah ke ifuresit esie; anam mmɔ esim isɔŋ: enye asa-bare itie edidem esie ye mbɔŋ esie.

³ Enye omosibe ofuri nduk Israel ke ikaŋ iyaresit: amakabare ubɔk nnasia esie afiak edem ke iso mme asua, onyuŋ asak ke Jacob nte edemikaŋ eke atade akan okuk.

⁴ Enye odudi utiga esie nte asua; onim nnasia esie nte owo utɔk, onyuŋ owot kpukpru mmɔ eke enemde owo ke enyin ke ataya adiaha Zion: enye aŋwaŋa ifuresit esie nte ikaŋ.

⁵ Ɔbɔŋ amakabare ebiet owo asua: omosobo Israel, omosobo kpukpru ikpɔ ufɔk esie; owuri mkpɔsɔŋ ebiet esie, omonyuŋ anam ubaha ye mfuhɔ ewak ke idem adiaha Judah.

⁶ Enye omonyuŋ owuri ɔkɔ esie, kpa nte eke iŋwaŋ: amabiat ebiet esop esie: Jehovah amanam efre usɔrɔ ye sabbath ke Zion, onyuŋ ɔduɔk edidem ye oku ke ikaŋ iyaresit esie.

⁷ Ɔbɔŋ ɔmɔduɔk itie-uwa esie, amasua edisana ebiet esie, ada ibibene ikpɔ ufɔk esie esin mbon usua ke ubɔk; mmɔ emenere uyo ke ufɔk Jehovah, kpa nte eke usen ederi.

⁸ Jehovah amaduak ndiwuri ibibene adiaha Zion: enye eneŋere uruk, imumke ubɔk esie isio ke erisobo: onyuŋ anam ɔkɔ ekɔŋ ye ibibene etua; mmɔ eyemere ɔtɔ kiet.

⁹ Mme itim esie ebuhɔ ke isɔŋ; enye abiat onyuŋ obuŋ eto usin-usuŋ esie: edidem esie ye mbɔŋ esie edu ke otu mme idut; ŋwed mbet iduhe: prophet esie inyuŋ ikwe ŋkukut eke otode Jehovah.

¹⁰ Mbiowo adiaha Zion etie ke isɔŋ, edop uyo: mmɔ emen ntan eduɔk ke ibuot mmɔ; emebɔbɔ ɔfɔŋ-ikpo ke idem: nditɔ iban Jerusalem etuk ibuot mmɔ ese isɔŋ.

¹¹ Mmɔŋeyet ekwehe mi enyin, nsia oyomo mi, esit mi ɔduɔhɔ ke isɔŋ abaŋa ŋwure adiaha oruk mi; koro eyenɔwɔŋ ye eyen nsek ɔduɔde mba ke aŋwan obio.

¹² Mmɔ edɔhɔ eka mmɔ, ete, Ibokpot ye wine edu mmɔŋ? ke ini mmɔ eduɔde mba nte mmɔ eke ekpaŋade afai ke aŋwa obio, ke ini mmɔ eduɔkde ukpɔŋ mmɔ esin eka mmɔ ke ikpanesit.

¹³ Ndidɔhɔ fi didie nte ntiense? Ndɔhɔ nte afo ebiet nso? Adiaha Jerusalem, ndida nso ndomo fi, man ndɔŋ fi esit, O adiaha Zion, eyenɔwɔŋ? koro ŋwure fo okponde nte inyaŋ; anie ekeme ndidiɔŋ fi?

¹⁴ Mme prophet fo ekut ikpikpu ye ndisime ŋkpɔ enɔ fi: inyuŋ iyarekede idiɔk ido fo, man eda fi ke itie ntaŋ mfep efiak edi; mmɔ ekut mbiomo nsu ye ŋkpɔ etabi enɔ fi.

¹⁵ Kpukpru owo eke esaŋade ke usuŋ ebe ekwak ubɔk ebaŋa fi; mmɔ esi enyuŋ eyibi ibuot mmɔ ebaŋa adiaha Jerusalem, ete, Nte emi edi obio eke ekedɔhɔde ete ke enye eye ama, onyuŋ adat ofuri ererimbot esit?

¹⁶ Kpukpru mme asua fo eŋwaŋade inua mmɔ ese fi; esi, enyuŋ eta edet: edɔhɔ ete, Nnyin imemen enye isin ke idibi; ŋkɔm emi edi usuŋ eke nnyin ibetde; nnyin imesime, imekut enye.

¹⁷ Jehovah anam se enye akaduakde ama; ama anam uyo esie oro enye okowukde ke eyo oko: enye owuri inyuŋ ituaha owo mbɔm: enye onyuŋ ayak usua adat esit abaŋa fi, onyuŋ emenere nduk owo utɔk fo onim ke enyɔŋ.

¹⁸ Esit mmɔ eseme ɔnɔ Ɔbɔŋ, ete, O ibibene adiaha Zion, yak mmɔŋeyet ɔsuhɔde nte akpa ke uwemeyo ye ke okoneyo: kunɔ idem fo nduɔk-odudu; kuyak eyen enyin fo odop.

¹⁹ Daha ke enyɔŋ tua ke okoneyo ke eritɔŋɔ efen, ŋwaŋade esit fo nte mmɔŋ ke iso Ɔbɔŋ: menere ubɔk fo nɔ enye baŋa ukpɔŋ nditɔ ɔwɔŋ fo, emi eduɔŋɔde mba ke biɔŋ ke ibuot kpukpru mme efak.

²⁰ O Jehovah, se nyuŋ tiŋ enyin ke idem owo emi afo anamde ntem ye enye. Nte iban ekpeta mfri mmɔ, nsek nditɔ emi mmɔ ekamade ke ubɔk? Nte ekpewot oku ye prophet ke edisana ebiet Ɔbɔŋ?

²¹ Nditɔwɔŋ ye mbiowo ena ke isɔŋ ke efak: nditɔ-iban mi ye mkparawa mi eduɔŋɔ ke ofut; afo okowot mmɔ ke usen iyaresit fo; owot, ndien utuaha mmɔ mbɔm.

²² Afo okokot ŋkpɔ ndik mi akan okuk kpa nte usen esop, ndien ke usen iyaresit Jehovah owo eke ɔbɔhɔde onyuŋ ɔsuhɔde iduhe. Usua omosobo mmɔ emi ŋkamade nnyuŋ mbɔkde.