NEHEMIAH 6 - Edisana ñwed Abasi Ibom

Mme Asua Eduak Idiɔk Uduak Ebaŋa Nehemiah ye Utom Esie

¹ EDIKEM adaŋemi Sanballat, ye Tobiah, ye Geshem Arabian, ye mme asua nnyin efen, ekopde ete ke mmɔbɔp ibibene, ke ŋwure inyuŋ isuhɔke ke esit; (okposuk edi nte mme ŋkaŋkɔŋke itim ke inua-otop ke ini oro).

² Ndien Sanballat ye Geshem edɔŋ edidɔhɔ mi ete, Di, nnyin isop idem ɔtɔ kiet ke obio ke itihere Ono. Edi mmɔ eduak ndinam mi idiɔk-ŋkpɔ.

³ Ndien ndɔŋ mme isuŋutom ke etɔ mmɔ, nte, Ami mmɔŋ nnam akamba utom, ndien ŋkwe nte nsuhɔrede: utom edinam didie odop, adaŋemi ami ŋkpɔŋde enye nsuhɔre ntiene mbufo?

⁴ Ndien mmɔ edɔŋ owo utom ikanaŋ ke ɔtɔ mi, edidɔhɔ ikɔ emi: ndien ami nnyuŋ mbɔrɔ mmɔ ntem.

⁵ Ekem Sanballat ɔdɔŋ owo esie utom ikotion ke ɔtɔ, mi edidɔhɔ suk ikɔ emi, akama ŋwed ana iŋwaŋ ke ubɔk esie;

⁶ ekewet ke esit, ete, Ke ekop ke otu mme idut, Gashmu onyuŋ ɔdɔhɔ, ete ke afo ye mme Jew ekere ndisɔŋ ibuot: oro esin afo ɔbɔp ibibene, afo onyuŋ akabare edi edidem mmɔ, kpa nte mme ikɔ emi esaŋade.

⁷ Ndien ŋko afo omonim prophet, ete ekwɔrɔ ebaŋa fi ke Jerusalem, ete ke edidem mmɔdo ke Judah: ndien ke emi ke editiŋ enɔ edidem, nte ikɔ emi asaŋade. Yak nnyin isop idem ɔtɔ kiet, ndien ikere se ikpanamde.

⁸ Ndien ami ndɔŋ utom ke ɔtɔ esie, nte “Ikemke ke ikɔ emi afo ɔdɔhɔde, edi afo otibi mmɔ ke esit fo.”

⁹ Koro kpukpru mmɔ enamde nnyin idikhe, ete, “Ubɔk eyemem mmɔ ke utom, man ekunam enye.” Sɔŋ mi ubɔk, ndien, O Abasi.

¹⁰ Ndien ami nduk ke ufɔk She-maiah eyen Dalaiah, eyen Mehe-tabel, emi ɔkukhɔde; ndien enye ɔdɔhɔ, ete, Yak nnyin isop ke ufɔk Abasi, ke esit temple, inyuŋ isin usuŋ temple: koro mmɔ edidide ndiwot fi; kpa ke okoneyo ke mmɔ edidi ediwot fi.

¹¹ Ndien ndɔhɔ, Nte owo ntem nte ami ekpefehe? Ndien anie owo ntem nte ami okpoduk ke temple man odu uwem? Ndukke.

¹² Ndien, sese, ŋkut nte ke idige Abasi ɔdɔŋ enye utom; edi enye eketiŋ prophecy emi abaŋa mi: koro Tobiah ye Sanballat ekenɔde enye ŋkpɔ.

¹³ Mmɔdo ekenɔde enye ŋkpɔ, man ami ndikhe, nnyuŋ nnam ntem, nnyuŋ ndue, man edi idiɔk etop ye mmɔ, man mmɔ esuene mi.

¹⁴ O Abasi, ti Tobiah ye Sanballat, kpa nte ŋkpɔ emi mmɔ enamde esaŋade, nyuŋ ti Noadiah prophet aŋwan, ye mme prophet efen emi esinde mi ndik.

¹⁵ Ekem mmɔ ema ibibene ke ɔyɔhɔ usen Elul edip ye duop, ke Usen aba ye duopeba.

¹⁶ Edikem adaŋemi kpukpru mme asua nnyin ekopde, adaŋemi kpukpru mme idut eke ekande nnyin ekuk ekutde ŋko, mmɔ esuhɔre eti-eti ke enyin idem mmɔ; ndien mmɔ efiɔk ete ke edi Abasi nnyin esin enam utom emi.

¹⁷ Ke mme usen oro ŋko mbɔŋ Judah enɔ ediwak ŋwed esɔk Tobiah, ndien eke Tobiah enyuŋ esim mmɔ.

¹⁸ Koro ediwak owo ke Judah ekeŋwɔŋɔde uŋwɔŋɔ enɔ enye, koro enye edide ukot Shecaniah eyen Arah: ndien Jehohanan eyen esie okonyuŋ ɔdɔ eyen Meshullam eyen Berechiah.

¹⁹ Ndien mmɔ enyuŋ etiŋ nti ido esie ke iso mi, enyuŋ emen uyo mi etiŋ enɔ enye ŋko. Tobiah ɔnɔ ŋwed esɔk mi, ete esin mi ndik.