NAHUM 3 - Edisana ñwed Abasi Ibom

Owo Ikemeke Ndimen Nsobo Nineveh Mfep

¹ ƆDƆDIƆK ɔnɔ obio afai! nsu ye mbume eyɔhɔ enye kpukpru; enye idopke ndiwai;

² uyom ikpa, ye uyom mme wheel, mme horse enyuŋ ekanade ekuk, mme chariot enyuŋ efrɔ:

³ mbon horse ke edɔk: ofut esem: eduat emineŋ: afai okpon; mme okpo ewak; mme okpo ekan ibat: etuak ukot ke mme okpo mmɔ eduɔŋɔ.

⁴ Emi oto ke uwak use ata ediye akpara, eka idiɔŋ, emi anyamde mme idut ke use esie, onyuŋ anyamde mme ufɔk ke idiɔŋ esie.

⁵ Jehovah mme udim ɔdɔhɔ ete, Sese, ami mmɔŋ nnam ikɔ ye afo; ndien nyefuhɔre fi edisine-ŋkpɔ fo nda mfuk fi iso, nnyuŋ ŋwut mme idut iferi fo, nyewut mme obio but fo;

⁶ nnyuŋ nduɔk fi ŋkpɔ ndek ke idem, nnyuŋ nsin fi ke ndek, nnyuŋ nnim fi ke ŋkpɔ ndise.

⁷ Ndien ama ekem kpukpru owo eke edikutde fi, eyefeŋe ekpɔŋ fi, enyuŋ edɔhɔ, ete, Nineveh omosobo: anie editua enye mbɔm? Ke ebiet ewe ke ndiyom owo eke edidɔŋde fi esit?

⁸ Nte afo ɔmɔfɔn akan Noamon, emi eketiede ke otu mme akpa mmɔŋ? Mmɔŋ akakan enye okuk, emi odudu esie edide inyaŋ, ibibene esie onyuŋ atuak ke mben inyaŋ.

⁹ Ethiopia ye Egypt edi odudu esie, ndien enye anana ibat; Put ye mme Lubim eŋwam fi.

¹⁰ Mmɔ eketaŋ enye efep ŋko, enye aka nte mbuot ekɔŋ: mmɔ enyuŋ esuok nditɔ-wɔŋ esie mbak-mbak ke mbuot kpukpru efak: enyuŋ esin afia ebaŋa mbɔŋ esie, enyuŋ ekɔŋ kpukpru ikpɔ owo esie ke ŋkpɔkɔbi.

¹¹ Afo ŋko eyeŋwɔŋ mmin akpa, onyuŋ onimi: afo ŋko eyenyuŋ oyom ebiet ifure abak usua.

¹² Kpukpru mkpɔsɔŋ ebiet fo ebiet eto fig ye akpa mfri eke adatde: ema enyeŋe mmɔ, mmɔ eduɔŋɔ ke inua owo eke adiade.

¹³ Sese, mbio fo eyedi iban ke ufɔt fo: inua-otop isɔŋ fo eyena iŋwaŋ enɔ mme asua fo, ikaŋ eyeta eto-usin-usuŋ fo.

¹⁴ Koi mmɔŋ ukuk obio nɔ idem fo, nam mkpɔsɔŋ ebiet fo esɔŋɔ; duk ke mbat, nyuŋ digi ntan; diɔŋ ɔtɔ ufɔp brick.

¹⁵ Do ke ikaŋ edita fi; ofut eyesibe fi efep, eyeta fi nte ŋkuku; wawak nte ŋkuku, wawak nte ŋkukuŋkpɔyɔriyɔ.

¹⁶ Afo emenyene mbon urua emi ewakde ekan ntanta-ɔfiɔŋ enyɔŋ: ŋkuku esuana, enyuŋ efeŋe.

¹⁷ Mbɔŋ fo eke eyarade anyanya ebiet ŋkukuŋkpɔyɔriyɔ: mme etubom mbon-ekɔŋ fo enyuŋ ebiet ata idiaŋ emi enade ke ɔkɔ ke usen tuep: utin asiaha, ndien mmɔ efeŋe: ndien owo ifiɔkke ebiet eke mmɔ edude.

¹⁸ Mme ekpemerɔŋ fo etie idap-idap, O edidem Assyria: mbɔŋ fo esuhɔre ena: ikɔt fo emesuana ke ikpɔ obot, ndien baba owo kiet eke edibonde mmɔ iduhe.

¹⁹ Nditaha fo inyeneke erikɔbɔ: unan fo omodoro ufiɔn: kpukpru mmɔ eke ekopde etop fo eyekwak ubɔk ebaŋa fi: koro anie owo odu eke idiɔk ido fo mikesimke enye kpukpru ini?